TONENUNGA!
Mukulwane Atala Hakulikangula chaVatu Nahanjika Ngwenyi Internet Yinahase Kwenyeka Vakweze—Vyuma Muka Yahanjika Mbimbiliya?
Ha 23 May 2023, mukulwane atala hakulikangula chavatu muUnited States alwezele vatu ngwenyi Internet yili nakwenyeka vakweze vavavulu.
Mumukanda waThe U.S. Surgeon General’s Advisory, 2023 muze vahanjika vyaInternet nakulikangula chavakweze muwongo (Social Media and Youth Mental Health) mwapwile mazu akwamba ngwavo, “Numba tuhu Internet yinahase kukafwa vanyike navakweze, oloze chinasoloka nawa nge yinahase kuvanehela ukalu muwongo nakumujimba.”
Ou mukanda wavulukile nawa mikanda yeka yize yahanjika ovyo vyatela kutulingisa tulizakamine.
Vakweze vamyaka yakusemuka 12 nakuheta ku 15 “vaze vayilenga haInternet hajiola jitatu nakuzombokaho hakumbi hakumbi, vanahase kuviza muwongo nakusolola vinjikizo vyakuhomba nakulizakamina.”
Vakweze vamyaka 14 “vaze vanazachisanga chikuma Internet vali nakumona ukalu wakuhona kusavala tulo, nakuvamba mazu amapi, nakuhona kusuuluka nasolokeso yavo, nakulivwa kupwa vamokomoko nakuhomba. Kaha ukalu kana weji kusolokelanga chikuma mapwevo kuhambakana malunga.”
Uno visemi vanahase kukinga ngachilihi vana vavo kuukalu kanou? Mbimbiliya yatwama najindongi jize jinahase kukukafwa.
Vyuma vahahase kulinga visemi
Kafwenunga vana venu. Enu visemi kukekesenunga mumone ukalu unahase kwiza nge mwanenu mwazachisa Internet, nakusakula numba nge atela kuyizachisa nyi chiku.
Lundongi lwamuMbimbiliya: “Longesa mwana mwaya jila yize atela kuya”—Vishimo 22:6, kwinyikila chamwishi.
Nge unakusaka kulinangula vyavivulu, tanga chihande chamuchingeleshi chakwamba ngwavo “Should My Child Use Social Media?”
Kachi nge wetavisa mwanove azachisenga internet kaha tachikiza ukalu unahase kufumamo nakutachikiza vyuma eji kulinganga mwanove haInternet. Unahase kulinga ngachilihi ngocho?
Kinga mwanove kuvyuma vyavipi. Nangula mwanove atachikizenga vyuma vyayipi nakulihendako.
Lundongi lwamuMbimbiliya: “Ujila, namajilo osena, nachipululu, kanda vavivulukila muli enuko, . . . chipwe vilinga vyakwivwisa sonyi, chipwe hanjikiso yauleya, chipwe kuseseka chakasautu.”—Wavaka-Efwesu 5:3, 4.
Hakusaka kuwana vishina navikukafwa, tala chihande chamuchingeleshi chakwamba ngwavo, “Teaching Your Teenager Social Media Safety.”
Kasa jishimbi. Chakutalilaho, kasa jishimbi jakusolola lwola natando mwanove atela kuzachisa Internet.
Lundongi lwamuMbimbiliya: “Nyingililenu ngwenu kutambuka mweji kutambukanga, . . . [mutambukenga] nge vaka-mangana, zachisenunga kanawa lwola lwenu.”—Wavaka-Efwesu 5:15, 16.
Zachisa vindiyo yavyakufunjejeka yakwamba ngwavo Pwenunga Vakuvanguluka Hakulituminanga Mijimbu haMakina mangana ukafwe mwanove atachikize ovyo chasakiwila kumuhana jishimbi kutalisa kuInternet.