Kutohwa chaUkalu Wakwivwa Uli—Vyuma Yahanjika Mbimbiliya
Kweseka nalipoti lyakalinwomu lyamukaye kosena, a kafwe mutu umwe havatu vawana, eji kwivwanga uli.
“Kala mutu nahase kuhona kupwa namutu wakulikata nenyi, chamokomoko nokwo ali chipwe myaka yenyi yakusemuka.”—Chido Mpemba, muhato wacheyamani waliuka lyaWorld Health Organization’s Commission on Social Connection.
Numba tuhu vatu veji kushinganyekanga ngwavo kashinakaji chipwe mutu uze ali ukawenyi ikiye kaha nahase kwivwa uli, olozenyi navanyike navaze valikangula, navaze vali nakufukila mukuyoya, kuhakilako vene navaze vali mumalo, navakiko vanahase kwivwa uli. Kulihandula kuvakwenu nakwivwa uli, vinahase kukunehela ukalu kumujimba namuvishinganyeka.
Dr. Vivek Murthy, ndotolo atala vyakupula vatu wamu U.S. ambile ngwenyi, “Kwivwa uli hiukalu wanene chikuma,” Ambile nawa ngwenyi: “Vatu vaze vali nakufwa mwomwo yakwivwa uli, vaneseka hamwe navatu veji kufwanga mwomwo yakunwa misanga yamankanya 15 halikumbi.”
Vyuma yahanjika Mbimbiliya
Tengi yetu kasaka tulihandulenga kuvakwetuko. Lwola lwosena Kalunga nasakenga ngwenyi vatu valikatenga navakwavo nakulivwisa kuwaha.
Lundongi lwamuMbimbiliya: “Kalunga ambile ngwenyi: ‘Kachawahile lunga kutwama uka wenyiko. Nangumutengela muka-kumukafwako, apwenga wakulisoka nenyi.’”—Kuputuka 2:18.
Kalunga asaka tutunge usepa nayikiye. Afwelelesa vaze navapandama kuli ikiye ngwenyi, nayikiye mwapandama kuli vakiko.—WaYakova 4:8.
Lundongi lwamuMbimbiliya: “Vawahilila vaze vejiva ngwavo vasaka vyuma vyakushipilitu, mwomwo Wangana wamelu unapu wavo.”—Mateu 5:3.
Kalunga asaka tumulemeselenga hamwe navakwetu. Kulinga ngocho nachitukafwa tupwenganga vakuwahilila.
Lundongi lwamuMbimbiliya: “Kaha tulihakenunga michima navakwetu mangana tulikolezeze tusolole zangi navilinga vyamwenemwene. Kaha kanda natusuvilila kulikungulwila hamweko, . . . oloze tulikolezezenunga navakwetu.”—WavaHepeleu 10:24, 25.
Nge uli nakusaka kutachikiza vyavivulu havyuma vyatela kutulingisa tuzate nangolo tuhonese ukalu wakwivwa uli, kaha tanga chihande chamuChingeleshi chakwamba ngwavo “Vatu Vali Nakwivwa Uli Chamokomoko Nakuvula chaMakina Muno Mukaye.”
a The Global State of Social Connections, by Meta and Gallup, 2023.