TONENUNGA!
Jita YamuUkraine Yinengila muMwaka Wamuchivali—Uno Mbimbiliya Yatuhana Lutalililo Muka?
LyaChitanu, ha 24 February, 2023, hakiko jita yamuUkraine yahetesanga mwaka umwe kufuma haze yaputukilile. Kweseka namijimbu yimwe, maswalale vamuUkraine namuRussia vakuheta ku 300,000 vanavajihi chipwe kuvalemeka, kaha nawa vatu 30,000 vanafu mujita. Chipwe ngocho, vatu vanafu chipwe kulemana vanahase kuhambakana hatotala tunavuluka.
Chaluvinda, chinasoloka nge jita kana kayeshi kukuma washiko.
“Munahichi kafwe mwaka umwe kufuma haze maswalale jaRussia valukukile lifuchi lyaUkraine, oloze kakweshi unjiho wakusolola nge vikokojola kana navikuma mukalinwomuko. Nalifuchi lili nakusoloka nge nalifungulula likwavo lyauchi, kaha nawa kakweshi unjiho wakusolola nge awa mafuchi avali anahase kuwana mwakukumishila jita kanako.”—NPR (National Public Radio), February 19, 2023.
Vatu vavavulu vali nakuhomba nakwivwa kupihya hakumona vatu vakuhona mulonga mukaye kosena vali nakumona ukalu mwomwo yapindangano kaneyi naukalu weka. Uno mbimbiliya yatuhana lutalililo muka? Uno jijita najikakuma tahi?
Jita yize nayikakumisa jijita josena
Mbimbiliya yavuluka jita yize nayikayovola vatu keshi kuvanongesako. Jita kana vayivuluka ngwavo Alamangetone, kaha vayilumbununa ngwavo “jita yahalikumbi lyalinene lyaKalunga Wangolo Josena.” (Kusoloka 16:14, 16) Kalunga mwakazachisa jita kana hakufumisako viyulo vyavatu vize vinanehe jijita jize jili nakwenyeka vyuma vyavivulu. Hakusaka uwane omwo Alamangetone nayikaneha kuunda chahaya myaka yosena, tanga vihande vinakavangizaho: