Vyakuhemahema vavuluka ngwavo Olympics vyamungonde yanonga yamu 2024, vanahase kukavitala kuvatu vakuheta kafwe kujimbiliyoni jitanu muze namukazana vatu vakufuma kumafuchi 206. Thomas Bach twamina wakomiti yavyakukuhemahema vyaOlympic ambile ngwenyi, “Tuli nakwazana muvyakuhemahema vize vyeji kukafwanga vatu vosena mukaye vatwame mukuunda nakulinunga. Tukundwizenu vyakuhemahema kana vize vyeji kukafwanga vatu vatwame mukuunda nakulinunga numba tuhu twafuma kumafuchi akulisezaseza.”

 Uno vyakuhemahema vyaOlympics vinahase kukafwa vatu vatwame mukuunda nakulinunga tahi? Uno nakukapwa lwola luze vatu navakatwama mukuunda nakulinunga tahi?

 Vyakuhemahema vyaOlympics vyauno mwaka vinalingisa vatu vashinganyeke nahavyuma vyeka. Vyukuhemahema kana vinashindakanya hamapolitiki navihande vyakumona vatu ulumbi vize vyeji kunehanga vihandwa. Omu munaliweze vihande vyahanjika halisesa lyavatu, nakulitala havikova,nakumona kwitava chimwe kupwa chachachilemu kuhambakana chikwavo nakumona vatu vamwe kupwa vakusalila.

 Vyakuhemahema vyamukaye vyakufwana nge vyaOlympics vyeji kuhizumunanga vatu. Chipwe ngocho, vyakuhemahema kana vyeji kukundwizanga vishinganyeka navilinga vize vyeji kunehanga vihandwa muchishishisa chakuneha kuunda nakulinunga chamwenemwene.

 Mbimbiliya yahanjikilile chimweza vilinga vize vinakulingisa vatu vahone kutwama mukuunda makumbi ano. (WaChimoteu 2, 3:1-5) Hakusaka ulinangule vyavivulu kutalisa kuupofweto kana, tanga chihande chamuChingeleshi chakwamba ngwavo “Did the Bible Predict the Way People Think and Act Today?”

 MuMbimbiliya mwatwama lutalililo lwamwenemwene kutalisa kukuunda nakulinunga. Yatushika ngwayo vatu vosena hano hamavu navakapwa vakulinunga omu navakatuyula kufulumende yamwilu vavuluka ngwavo “Wangana waKalunga.”—Luka 4:43; Mateu 6:10.

 Yesu Kulishitu uze apwa Mwangana waWangana kana mwakaneha kuunda mukaye kosena. Mbimbiliya yamba ngwayo:

•   “Vaka-kwoloka navakafukilanga, kaha nakukapwa kuunda chamwenemwene.”—Samu 72:7.

•   “Mwakapululula vaka-kuhutwa vaze vali nakutwa kawelele . . . Mwakavapululula kuluyanjisa nakuulyanyi.”—Samu 72:12, 14.

 Namakumbi ano, vyuma anangwile Yesu vinalingisa vatu vakumafuchi 239 vapwenga vakulinunga. Vinjiho jaYehova mukaye kosena vanalinangula mwakutwamina mukuunda. Hakusaka uwane omwo unahase kulinga ngocho, tanga mangazini yaKaposhi Kakutalila yakwamba ngwavo “Honesenu Chijindo Kutanda.”