Liuka lyaUnited Nations lyahanjikanga ngwalyo:

•   Kufuma ha 7 October nakuheta ha 23 October 2023, vatu vanafu kujita yaGaza naIsrael vanahambakana ha 6,400 kaha vakulemana vanahete ku 15,200, kaha havatu kana, vavavulu shina vaze kavazata mulimo wauswalaleko. Mayevuyevu avatu nawa, vanaseze membo avo.

•   Vatu vanafu kujita yaRussia naUkraine kufuma haze yaputukilile nakuheta ha 24 September, 2023, vaze kavazata mulimo wauswalaleko, vanahete ku 9,701 kaha vakulemana vanahete ku 17,748 muUkraine.

 Uno Mbimbiliya yahana lutalililo muka vatu vaze vali nakuyanda mwomwo yajita?

 Mbimbiliya yapolofwetele ngwayo Kalunga “[mwakakumisa] jijita hamavu hosena.” (Samu 46:9) Mwakazachisa fulumende yamwilu chipwe ngwetu wangana wamwilu, mangana akafumiseko jifulumende javatu. (Ndanyele 2:44) Wangana waKalunga naukakumisa ukalu vali nakumona vatu.

 Ivwa vyuma mwakalinga Yesu Kulishitu, uze apwa Mwangana waWangana waKalunga:

•   “Mwakapululula vaka-kuhutwa vaze vali nakutwa kawelele, navaka-kukalikiza navaze vazeneka mutu wakuvakafwa. Mwakevwila keke vaka-kukalikiza navaka-kuhutwa, mwakalwila myono yavaka-kuhutwa. Mwakavapululula kuluyanjisa nakuulyanyi, kaha manyinga avo nawakapwa amalemu kumeso enyi.”—Samu 72:12-14.

 Kalunga mwakazachisa Wangana wenyi mangana akafumiseko ukalu vali nakumona mwomwo yajijita naulyanyi.

•   “Mwakahunda masoji osena kumeso avo, kufwa kacheshi kukapwako chekako, kaha nawa kakweshi kukapwa cheka kulishona, chipwe miteto, chipwe kukolako. Vyuma vyakulivanga vinafumuko lyehi.”—Kuso. 21:4.

 Kalinwomu ngana Wangana waKalunga nawalumuna vyuma hano hamavu. Mbimbiliya yapolofwetelele chimweza “jijita namijimbu yajijita” yize tuli nakumona nakwivwa makumbi ano. (Mateu 24:6) Vyuma kana navyuma vyeka vyasolola nge tuli nakuyoyela “[mu]makumbi akukuminyina” achiyulo chavatu.—WaChimoteu 2, 3:1.