TONENUNGA!
Uno Mafuchi Anahase Kulinunga Mangana Akumise Ukalu waKulyenyeka chaJingonde Tahi?—Vyuma Muka Yahanjika Mbimbiliya?
Lyasondo, 20 December 2022, vatwamina vakumishile kuliwana chakushimutwila vyakulyenyeka chajingonde cha COP27, chize vavuluka ngwavo United Nations Climate Change chaliuka lyaUN. Numba tuhu vatwamina valivwasanyine ngwavo navakundwiza jimbongo jakukafwa mafuchi akuhutwa mangana ahonese ukalu wakulyenyeka chajingonde, oloze vamwe vamwene ngwavo ukalu kana kaweshi kuhasa kukumako.
Ha 19 November 2022, twamina waliuka lyaUnited Nations, António Guterres ambile ngwenyi: “Ngunawahilila hachivwasano tunalikase chakukundwiza jimbongo jakukafwa mafuchi aze ali muukalu wakulyenyeka chajingonde. Chipwe ngocho vyuma tunalikase kavyeshi kuhasa kukumisa ukalu wetu wosenako . . . mwomwo ukalu wakulyenyeka chajingonde uli nakutwalililaho hano mavu.”
Ha 20 November 2022, Mary Robinson, uze apwile twamina walifuchi lyaIreland uze nawa apwile twamina wachihanda chatala haLisesa Vatwama Nalyo Vatu, chaliuka lyaUN ambile ngwenyi: “Kalinwomu jingonde jipihye chikuma nakulingisa vatu vosena vapwenga muukalu waunene chikuma.”
Vakweze vavavulu vanalizakamina chikuma havyuma navikasoloka kulutwe hano hamavu. Uno mafuchi anahase kuzachila hamwe mangana akumise ukalu wakulyenyeka chajingonde tahi? Vyuma muka yahanjika Mbimbiliya?
Uno Mafuchi nawakalinunga nakufukila tahi?
Mbimbiliya yasolola hatoma ngwayo chamokomoko nakukilikita chavatu nakufwila chavo chakusaka kukumisa ukalu wakulyenyeka chajingonde, kacheshi kufukilako. Tala vishina vivali tunahanjikila ngocho:
“Vyuma vinahenge kaveshi kuhasa kuvyololako.”—Muka-kwambulula 1:15.
Mwalumbunukila Mazu Kana: Jifulumende kajeshi nangolo jakukumisa ukalu wosenako, mwomwo vatu kavavatengele mangana valiyule vaveneko. (Yelemiya 10:23) Numba nge vaka-mafuchi navalinunga nakuzata tuhu ngachilihi nangolo, oloze kaveshi kuhasa kukumisa ukalu wosena uli muno mukayeko.
“Vatu navakapwa vaka-kulizanga vavene, vaka-kuzanga jimbongo, . . . vaze kaveshi kwitavila vivwasanoko.”—WaChimoteu 2, 3:2, 3.
Mwalumbunukila Mazu Kana: Mbimbiliya yahanjikilile chimweza ngwayo vatu vavavulu makumbi ano navakalizanga vavene nakuhona kuzachila hamwe navakwavo mangana vawahise vyuma.
Ovyo twatela kupwila nalutalililo
Chipwe ngocho, kuwaha chavyuma hano hamavu kachapendamina hajishiko veji kushikanga vatwamina vajifulumendeko. Kalunga ahakako Twamina wamwenemwene Yesu Kulishitu. Mbimbiliya yahanjika hali ikiye ngwayo:
“Fulumende [nayikapwanga] hachifwiji chenyi. Lijina lyenyi navakamuvulukanga ngwavo Muka-kulweza Mangana Wakukomwesa, Kalunga waNgolo, Setu waHaya Myaka Yosena, Mwata waKuunda.”—Isaya 9:6, kwinyikila chamwishi.
Yesu ikiye Mwangana waWangana waKalunga chipwe ngwetu fulumende yamwilu. (Mateu 6:10) Atwama nangolo, namangana kaha nawa afwila kuwahisa mavu nakuzakama vatu vatwamaho. (Samu 72:12, 16) Omu mwakaputuka kuyula, hano hamavu kaheshi kukapwa vatu vaze veji “kwenyekanga mavu[ko].” Kaha nawa mwakawahisa hano hamavu hosena.—Kusoloka 11:18, kwinyikila chamwishi; Isaya 35:1, 7.
Hakusaka kulinangula vyavivulu kutalisa kuvyuma vize vinahase kukumisa ukalu wakulyenyeka chajingonde, tala chihande chamuchingeleshi chakwamba ngwavo Climate Change and Our Future—What the Bible Says.”