Hamyaka 30 yinahichi kunyima vatu vavavulu vanamononga ngwavo mukaye muli kuunda, kaha nawa vyuma vili nakuwahilako. Oloze oholyapwa vishinganyeka vyavatu vinalumuka mwomwo yavyuma vili nakusoloka.

•   “Vatu vanalizakamina ngwavo jita yili muGaza yinahase kutanda hakuwana nge maswalale jaLifuchi lyaIsrael, vali nakulizungishila hamuseto walifuchi lyaLebanon nalizavu lize vavuluka ngwavo Hezbollah.”—Reuters, January 6, 2024.

•   “Mazavu amaswalale aze vakundwiza kulifuchi lyaIran ali nakuneha pindangano kuvihela vyavivulu, kaha nawa eli lifuchi linaputuka cheka kutunga mata atendazungu. Kaha nawa Iran yinalikate usepa nalifuchi lyaRussia naChina. Chuma kana chili nakulingisa mafuchi akumulauko alizakamine.”—The New York Times, January 7, 2024.

•   “Maswalale jalifuchi Russia vachili nakutwalaho kwenyeka vyuma vyavivulu muUkraine.”—UN News, January 11, 2024.

•   “Hakuwana nge lifuchi lyaChina lili nakuzovoloka muluheto namuvitwa vyajita, lifuchi lyaTaiwan nawa lili nakufwila kulimanyina, kaha nawa usepa walifuchi lyaChina na United States uli nakusekenya, echi chili nakusolola nge kunahase kwepuka vikokojola.”—The Japan Times, January 9, 2024.

 Uno Mbimbiliya yahanjika havikokojola tuli nakumona makumbi ano tahi? Kutala navyepula jita yakaye tahi?

 Mbimbiliya kayahanjika hatoma ovo navakalwa jita mumakumbi akukuminyinako. Chipwe ngocho, yahanjikilile chimweza vyakuvula chajijita tuli nakumona makumbi ano, jize nawa jili “[nakufumisa] kuunda hamavu.”—Kusoloka 6:4.

 Mukanda waNdanyele wapolofwetele ngwawo “hamakumbi akukuminyina” viyulo vyangolo vyakaye ‘navikalipika,’ chipwe ngwetu kufwila kupwa nangolo jakuyula. Mukulipika kana mwaliweza kupwa navitwa vyajita vyangolo nakuzachisa ‘luheto’ lwaluvulu chipwe ngwetu jimbongo.—Ndanyele 11:40, 42, 43.

 Mbimbiliya yasolola ngwayo vyuma mukaye navipihilako lika numba jino vikapwe kanawa. Yesu ahanjikilile chimweza ngwenyi “nakukapwa luyando lwalunene, luze kanda lusolokengaho lyehi kufuma kukuputuka chakaye.” (Mateu 24:21) Elu “luyando lwalunene” nalukaneha jita vavuluka ngwavo Alamangetone, yize valumbununa kupwa “[jita] yahalikumbi lyalinene lyaKalunga Wangolo Josena.”—Kusoloka 16:14, 16.

 Chipwe ngocho, Alamangetone nayikalwila vatu, keshi kuvanongesako. Kalunga mwakazachisa jita kana mangana akafumiseko jifulumende javatu jize jeji kunehanga jijita. Hakusaka uwane omwo Alamangetone nayikaneha kuunda chahaya myaka, tanga vihande vino:

•   “Uno Jita yaAlamangetone Yapwa Ika?”

•   “Tutalililenu Kwiza chaJita yaAlamangetone”