Jimbongo vazachisanga kumulimo wauswalale mukaye kosena jatohwanga chikuma nakuheta kujitililiyoni jajindola ja U.S. 2.24 mu 2022, chikumanyi mwomwo yajita yalifuchi lyaRussia lize lyalukukanga lifuchi lyaUkraine. Kweseka nalipoti valowele vaka-liuka lyatala hakuunda chamukaye lyaStockholm International Peace Research Institute (SIPRI), muApril 2023, lyasolwele nge mu 2022:

•   Jimbongo vazachishile muEuropean kumulimo wauswalale, “janyinyine najipaseti 13 mumwaka kana, kaha kanda lyehi vahetesengaho lyehi paseti kana mumwaka umwe muEurope kufuma mu 1991.”

•   “Jimbongo vazachishile vaka-Russia…janyinyine nakuheta kujipaseti kafwe 9.2, kaha linafumu halifuchi lyamuchitanu, nakupwa lyamuchitatu kuzachisa jimbongo jajivulu mukaye kosena.”

•   Lifuchi lyaUnited States lichili lika helu mukuzachisa jimbongo kumulimo wauswalale, mwomwo “lyazachisanga jimbongo jakuheta kujipaseti 39.”

 Mutu alinangula chikuma Dr Nan Tian, umwe wavaze vasonekele lipoti lyavaka-SIPRI ambile ngwenyi: “Kuvula chajimbongo vanazachisanga kumulimo wauswalale mumyaka yakalinwou chili nakusolola nge kano kaye kakeshi kakukingiwako.”

 Mbimbiliya yahanjikilile chimweza vikokojola tuli nakumona mukachi kajifulumende, kaha nawa yasolola chuma chize nachikaneha kuunda.

•   Mbimbiliya yavuluka makumbi tuli nakuyoyelamo ngwayo ‘lwola lwakukuminyina.’—Ndanyele 8:19.

•   Mukanda waNdanyele wahanjikilile chimweza ngwawo halwola kana nakukapwa kulipika chaviyulo vyakaye vyangolo. Yambile ngwayo evi viyulo ‘navikalipikanga’ kufwila wata. Echi kulipika nachikasakiwa kuzachisa luheto lwaluvulu chikuma, chipwe ngwetu jimbongo.—Ndanyele 11:40, 42, 43.

 Hakusaka utachikize vyavivulu kutalisa kuupolofweto kana, tala vindiyo yakwamba ngwavo, Kutesamo chaUpolofweto WamuMukanda waNdanyele Kapetulu 11.

•   Mbimbiliya yahanjika ngwayo Kalunga mwakafumisako jifulumende javatu. “Mwakahakako wangana uze kaveshi kukanongesako. Wangana kana kaveshi kukauhana kuvatu vekako. Naukachika mawangana osena awa nakuwanongesa, kaha ukiko naukapwangako haya myaka yosena.”—Ndanyele 2:44.

•   Yehova a Kalunga kalinwomu anehe kuunda chamwenemwene chakwilila, chize vali nakuhona kuneha vatu. Mwakalinga ngachilihi ngocho? Wangana wenyi, uze wapwa fulumende yamwilu naukafumisako vitwa vyosena nakukumisa ulyanyi wosena.—Samu 46:8, 9.

 Hakusaka ulinangula vyavivulu kutalisa kuvyuma naukalinga Wangana waKalunga, tanga chihande chakwamba ngwavo, “‘Nakukapwa Kuunda Chamwenemwene’ muWangana waKalunga.”