TONENUNGA!
Ulyanyi waKuliloza Mukaye Kosena—Vyuma Muka Yahanjika Mbimbiliya?
MuJuly 2022, vatu vavalozele chikuma mukaye kosena:
“Omu vajihile muka-mapolitiki [Shinzo Abe uze apwile Twamina waVilolo jaLiuka lyaJishimbi] uze aya chikuma fuma mulifuchi lya Japan vatu vamulifuchi kana vevwile kupihya chikuma. Vatu mukaye kosena nawa valikomokelele, hakuwana nge mulifuchi kana kamwavula kusolojoka ulyanyiko kaha vatwama nawa najishimbi jajikalu chikuma jahanjika hakupwa nauta.”—July 10, 2022, The Japan Times.
“Vaka-Denmark valikomokelele chikuma omu lunga umwe alozele nakujiha vatu vatatu hachitanda chachinene chamu Copenhagen.”—July 4, 2022, Reuters.
“South Africa: Vatu 15 vafwanga hakuvaloza kumalunga vapwanga namata mumbaka yaSoweto.”—July 10, 2022, The Guardian.
“Hamakumbi akunoka akusongo yachalumingo chakukokela ku July 4, vatu vakuzomboka ha 220 vavalozanga nakuvajiha mu U.S.”—July 5, 2022, CBS News.
Kutala tunahase kufwelela ngwetu ulyanyi kana naukakuma tahi? Vyuma muka yahanjika Mbimbiliya?
Ulyanyi Naukakuma
Mbimbiliya yavuluka makumbi tuli nakuyoyelamo ngwayo “makumbi akukuminyina” muze muli vatu vaulyanyi, naukenya nauhwanga. (WaChimoteu 2, 3:1, 3) Vilinga kanevi vyaulyanyi vyeji kulingisanga vatu vayoye nachiwomawoma. (Luka 21:11) Chipwe ngocho Mbimbiliya yahanjika halwola luze naukakuma ulyanyi kaha vatu “navakatwamanga kuvihela vyakuunda, navakatwamanga kuvihela vyakukingiwa, nakuvihela vyakulu.” (Isaya 32:18) Uno ulyanyi naukakuma ngachilihi?
Kalunga mwakafumisako vaka-kuhuka nakuchika vitwa vyosena.
“Vaka-kuhenga navakavateta hamavu.”—Vishimo 2:22.
“[Kalunga] mwakumisa jijita hamavu hosena. Mwahokwojola mata amanana nakuchika makunga. Mwocha matemba ajita nakakahya.”—Samu 46:9.
Kalunga mwakafumisako vyuma vyeji kunehanga ulyanyi hakunangula vatu vakatwamenga mukuunda.
“Kupili yami yajila kaveshi kukenyekako chipwe kupihisako mwomwo hamavu hosena nahakazala nachinyingi chakumutachikiza Yehova nge muze kalungalwiji azala nameya.”—Isaya 11:9.
Namakumbi ano, Kalunga ali nakunangula vatu mukaye kosena valihende kuulyanyi nakukuzachisa vitwa, ‘hakufululula jipoko javo jamikwale kupwa matemo akulimisa, nakufululula nawa makunga avo kupwa jipoko jakunongesa kumitondo.’—Mika 4:3.
Nge uli nakusaka kutachikiza vyavivulu halushiko lwamuMbimbiliya lwakutwama mukaye chakuzeneka kwivwa woma, tanga chihande chamuChingeleshi chakwamba ngwavo “Freedom From Fear—Is It Possible?”
Nge uli nakusaka kutachikiza vyavivulu hachuma chize nachikafumisa ulyanyi haya myaka, tanga chihande chamuChingeleshi chakwamba ngwavo “Peace on Earth at Last!”