TONENUNGA!
Vaka-Kulishitu naJita—Vyuma Muka Yahanjika Mbimbiliya?
Jita yili mulifuchi lyaUkraine yinasolola hatoma omwo vatwamina vavaka-Kulishitu vavavulu vali nakukundwiza jita. Tala omwo vatwamina vavaka-Kulishitu vamumafuchi osena avali vali nakukundwiza vikokojola:
“Tunawahilila nakuvumbika maswalale vaze vali nakukinga lifuchi lyaUkraine kuli muka-kole . . . Tuli nakumilombelako kufuma kumichima nakumikundwiza.”—Metropolitan Epiphanius I wamuKyiv, omu mukiko vasonekanga mulipapilo lyamijimbu lyaThe Jerusalem Post, March 16, 2022.
“Twamina wachachi yaRussian Orthodox akungulwile maswalale javaka-Russia nakuvakolezeza vakinge lifuchi lyavo lyaRussia omu maswalale vali nakuliwahishila muMoscow vyakulukuka lifuchi lyaUkraine.”—Reuters, April 3, 2022.
Uno vaka-kulishitu vatela kuzunga jita tahi? Vyuma muka yahanjika Mbimbiliya?
Vyuma Yahanjika Mbimbiliya
Mbimbiliya yasolola hatoma ngwayo vaze veji kukavangizanga Yesu kavazunga jitako.
“Kindulwisa poko yove yamukwale muchindalo chayo, mwomwo vosena vaze navakwata poko yamukwale navakanonga kupoko yamukwale.”—Mateu 26:52.
Uno mutu uze eji kuzunganga jita chipwe kuyikundwiza, eji kwononokanga mazu aYesu tahi?
“Nguli nakumihana lushimbi lwaluhya ngwami mulizangenga navakwenu. Kaha nganomu ngunamizangenga enu, nayenu nawa lizangenunga navakwenu. Vatu vosena navakatachikiza ngwavo enu mwapwa mutumbaji twami kachi nge namulizanganga mwenumwenu.”—Yowano 13:34, 35.
Uno mutu uze eji kukundwizanga jita, eji kusololanga zangi yize ahanjikile Yesu ngwenyi ikiko navakatachikijilako tumbaji twenyi chipwe vaka-kumukavangiza tahi?
Nge uli nakusaka kutachikiza vyavivulu, kaha tanga chihande chamuChingeleshi chakwamba ngwavo “Is War Compatible With Christianity?”
Vaka-Kulishitu najita yiliko makumbi ano
Uno chapwa chamangana vaka-Kulishitu kulihenda kukwazana mujita makumbi ano tahi? Eyo. Mbimbiliya yahanjikilile chimweza ngwayo mumakumbi ano tuli nakuyoyela, aze vavuluka ngwavo ‘makumbi akukuminyina,’ nakukapwa vatu vakufuma kumafuchi osena vaze “kaveshi kukalinangula cheka jitako” ngana muze anangwilenga Yesu.—Isaya 2:2, 4.
Hakusaka utachikize vyavivulu, tanga vihande vyamuKaposhi Kakutalila vyakwamba ngwavo “Kalunga Amona Ngachilihi Kulwa Jita?”
Kalinwomu Yehova a “Kalunga wakuunda,” azachise fulumende yenyi yamwilu apululule vatu “kuluyanjisa nakuulyanyi.”—Wavaka-Fwilipi 4:9; Samu 72:14.
Hakusaka utachikize jila mwakalingilamo ngocho, tala vindiyo yakwamba ngwavo Wangana waKalunga Chuma Muka?
a Yehova likiko lijina lyaKalunga.—Samu 83:18.