TONENUNGA!
Uno Vatu Navakecha Kumona Vakwavo Ulumbi Tahi?—Vyuma Muka Yahanjika Mbimbiliya?
Hamyaka yayivulu vatu vanahono kukumisa ukalu wakulimona ulumbi.
“Kulimona ulumbi chinafwane nge ulembe uze uli nakuneha ukalu mumauka namuchiyoyelo chavatu vamuchivulu. Kulimona ulumbi chinalingisa nawa vatu vatwaleho lika kuyanjisa vakwavo.”—António Guterres uze apwa twamina waliuka lya UN.
Uno vatu navakecha kumona vakwavo ulumbi tahi? Vyuma muka yahanjika mbimbiliya?
Omwo Kalunga amona kulimona ulumbi
Mbimbiliya yatulweza omwo Kalunga eji kumonanga vatu vakuvisemwa vyakulisezaseza.
“Kumutu umwe [Kalunga] aloweleko miyachi yavatu yosena mangana ngwenyi vatwamenga hamavu hosena.”—Vilinga 17:26.
“Kalunga katala vatu kumesoko, oloze muli vaka-miyachi yosena, ou eji kumwivwanga woma nakulinganga vyuma vyakwoloka, veji kumwitavilanga kuli Kalunga.”—Vilinga 10:34, 35
Mbimbiliya yahanjika ngwayo vatu vosena vapwa tanga yimwe, kaha nawa Kalunga eji kwitavilanga vatu vakuvisemwa vyosena.
Omwo kulimona ulumbi navakachifumisako
Kulimona ulumbi navakachifumisako kuWangana waKalunga uze wapwa fulumende yamwilu. Fulumende kana nayikanangula vatu mwakutwamina mukuunda navakwavo, ngocho vatu kaveshi kukamonanga vakwavo ulumbiko.
“Vatu [navakalinangula] kwoloka.”—Isaya 26:9
“Kwoloka chamwenemwene nachikaneha kuunda. Kwoloka chamwenemwene nachikaneha kuunda namukingo haya myaka yosena.”—Isaya 32:17
Makumbi ano, vatu vavavulu vali nakulinangula muMbimbiliya mwakuvumbikila vatu vakuvisemwa vyeka nakuvamona kupwa vavalemu.
Hakusaka ulinangule vyavivulu, tanga mangazini yaTonenu! Yakwamba ngwavo “Kutala Ulumbi Vanahase Kuufumisako Tahi?”
Hakusaka utachikize omwo unahase kushimutwila chihande kana natanga yove, tanga chihande chamuChingeleshi chakwamba ngwavo “Talking to Children About Racism.”