TONENUNGA!
Mwomwo Ika Vatu Vanechela Kulinga Vyuma Vyamwaza?—Vyuma Muka Yahanjika Mbimbiliya?
Vatu vavavulu vaneche kulinga vyuma vyamwaza. Vaveji vavakalu michima veji kutenukilanga vandotolo, kaha nawa vatu vaze veji kulilanga mujizuvo jakulanjishila vyakulya veji kutenukilanga vatu vaze veji kupangilanga vatu vyakulya, vaze veji kutambukilanga mujindeke nawa veji kuvetanga vaka-kuzakama vatu mujindeke, vana vakulivwimba veji kuhendanga, nakuyanjisa nakulemeka milongeshi javo, kaha nawa vatwamina vamapolitiki vamwe veji kulinganga vyuma vyakuhenga oku vatwamina vamapolitiki veka veji kufwelelesanga vatu ngwavo navavalingila vyuma vyamwaza.
Mbimbiliya himukanda vafwelela vatu uze weji kukafwanga vatu valinge vyuma vyamwaza. Kaha nawa yalumbununa ovyo vilinga vyakuhenga vinavulila makumbi ano.
Mwomwo Ika Vatu Vanechela Kulinga Vyuma Vyamwaza?
Vilinga vyavatu mukaye kosena vili nakupihilako lika.
Kweseka nakulava chimwe chapwileko, chasolwele nge vaka-America vanawane ngwavo mumyaka 22 yinahichimo, oholyapwa hakiko vilinga vyavatu muUnited States vinapihi chikuma.
Hanyima yakwihwojwola vatu vakuzomboka ha 32,000 vamumafuchi 28, vavavulu vahanjikle ngwavo makumbi ano vatu vavavulu chikuma vali navilinga vyakuhenga kuhambakana muze chapwile kunyima.
Mbimbiliya yahanjikilile chimweza vilinga vyavatu vize tuli nakumona makumbi ano.
“Hamakumbi akukuminyina nahakapwa lwola lwalukalu. Mwomwo vatu navakapwa vaka-kulizanga vavene, vaka-kuzanga jimbongo, vaka-kulitukwojola, vaka-kulitohwesa, vaka-kusaula, vaka-kulikanga kuli visemi, vaka-kuhona kusakwilila, . . . vaka-kuhona muchima wakulikanyisa vavene, vaka-ukenya.”—WaChimoteu 2, 3:1-3.
Hakusaka utachikize omwo uli nakutesamo upolofweto kana, tanga chihande chamuChingeleshi chakwamba ngwavo “Did the Bible Predict the Way People Think and Act Today?”
Mukanda vafwelela vatu uze weji kuvakafwanga vapwenga navilinga vyamwaza
Numbu tuhu mukaye munalisale vilinga vyakuhenga, oloze vatu vavavulu vanawane nge Mbimbiliya yili nakuvakafwa vapwenga navilinga vyamwaza. Jindongi jatwamamo jakutalisa kukatwamino katoma “jatamo kujifwelela oholyapwa nahaya myaka yosena.” (Samu 111:8) Achitale havyakutalilaho vino:
Vyuma yahanjika Mbimbiliya: “Vyuma vyosena namusaka ngwenu vatu vamilingile, nayenu nawa valingilenuvyo.”—Mateu 7:12.
Mwalumbunukila Mazu Kana: Twatela kutetelanga vakwetu nakuvavumbikanga ngana muze twasaka valinge nakuli yetu nawa.
Vyuma yahanjika Mbimbiliya: “Hakuwana nge munaseze jino makuli, mutu himutu ahanjikenga muchano namukwavo.”—Wavaka-Efwesu 4:25.
Mwalumbunukila Mazu Kana: Twatela kupwa vakashishi muvyuma vyosena tweji kuhanjikanga nakulinga.
Hakusaka uwane mijimbu yayivulu hachihande kana, tunakulombo utange:
Kaposhi Kakutalila chakwamba ngwavo “Kusakula Vyuma Vyakwoloka Chipwe Vyakuhenga—Jindongi Munahase Kufwelela.”
Chihande chakwamba ngwavo “Uno Mbimbiliya Yinahase Kutukafwa Ngachilihi Tuvumbikenga Vishinganyeka vyaVakwetu?.”