Ha 19 May 2022, vilolo vakuhambakana 75 valwezele liuka lyaUnited Nations Security Council ngwavo, musongo wachihita wa COVID-19 nakwalumuka chajingonde vinalingisa kulya chikaluhwe mukaye kosena. Oloze jita yili muUkraine yinalingisa kulya chikaluhwe chikuma, kaha kuvihela vimwe kunahase kupwa zala yakalombolombo.” Kufumaho mangazini yaThe Economist yambile ngwayo “mukaye muli ukalu wauvulu chikuma, kaha jita nayilingisa vatu vavavulu vahone kupwa navyakulya.” Mbimbiliya yahanjikilile chimweza ngwayo mumakumbi ano tuli nakuyoyelamo kulya nachikakaluhwa, kaha nawa yatulweza vyuma vize vinahase kutukafwa tumike.

•   Yesu ahanjikilile chimweza ngwenyi: “Lifuchi limwe nalikafumbukila lifuchi likwavo, kaha wangana umwe naukafumbukila wangana ukwavo, kaha kuvihela vyeka navyeka nakukapwa zala.”—Mateu 24:7.

•   Mukanda wamuMbimbiliya waKusoloka wahanjika havaka-kutambuka hatuvalu vawana vachifwanyisa. Muka-kutambuka hakavalu umwe emanyinako jijita, kaha uze ali munyima yenyi emanyinako zala yakalombolombo. Lwola luze nachikapwa chachikalu kuwana vyakulya kaha nawa navakavilandanga handando yayinene. “Ngwevwile muka-kuyoya wamuchitatu mwamba ngwenyi: ‘Ngwamwene kavalu wilava, kaha uze atwamineho apwile nachipezaliso mulivoko lyenyi.’ [Ngwevwile nawa] lizu lyakwamba ngwavo: ‘Kwate yimwe yatiliku, ndando yayo ndenali yimwe, kaha jikwate jitatu jambale, ndando yajo ndenali yimwe. Kaha kanda nawenyeka maji amulive navinyoko.’”—Kusoloka 6:5, 6.

 Ou upolofweto wamuMbimbiliya wakukeha chavyakulya uli nakutesamo makumbi ano, aze vavuluka muMbimbiliya ngwavo “makumbi akukuminyina.” (WaChimoteu 2, 3:1) Hakusaka utachikize vyavivulu “hamakumbi akukuminyina” navaka-kutambukisa tuvalu vavuluka hali Kusoloka, tala vindiyo yakwamba ngwavo Kaye Kanalumukanga Kufuma Vene mu 1914 nakutanga chihande chakwamba ngwavo “Uno Vaka-kutambuka haTuvalu Vawana Vemanyinako Ika?”

•   MuMbimbiliya mwatwama jindongi jamwenemwene jize najitukafwa tumike chamokomoko naukalu natumona, kuhakilako vene naukalu wakutohwa chajindando javyakulya naukalu wakukeha chavyakulya. Tala jindongi jimwe muchihande chakwamba ngwavo “Mwakuyoyela Nge Uli naJimbongo Jajindende.”

•   Kaha nawa Mbimbiliya yatuhana lutalililo ngwayo vyuma navikawaha kulutwe. Yashika lwola luze “hamavu nahakapwanga mbuto jamanona jakulisala” kaha nawa mutu himutu mwakapwanga navyakulya vyavivulu. (Samu 72:16) Hakusaka utachikize vyavivulu havyuma vyamwaza yatushika Mbimbiliya novyo watela kuvifwelela, tanga chihande chamuChingeleshi chakwamba ngwavo “Lutalililo Lwakukapwa Nakuyoya Chamwaza Kulutwe.”