TONENUNGA!
Vyanga Vyavinene—Vyuma Muka Yahanjika Mbimbiliya?
“Vaka-China vanambe ngwavo uno mwaka, himwaka wamuchitatu uze kwazumanga chikuma mungonde yanonga.”—The Guardian, 7 September, 2022.
“Mumafuchi amavulu amuEurope namupwa changa chachinene, kaha nawa changa kana chikiko nachipwa chachinene mumyaka 500 yinahichimo.”—Mijimbu yavaka-BBC, August 23, 2022.
Vakuluwa vavavulu vanambe ngwavo vyanga kana navitwalaho lika kaha nawa vinahase nakutohwelako. Uno kulutwe vyuma navikawaha tahi? Vyuma muka yahanjika Mbimbiliya?
Vyanga vili nakutesamo upolofweto wamuMbimbiliya
Mbimbiliya yahanjikilile chimweza kutalisa kumakumbi etu ngwayo:
“Kuvihela kweka nakweka nakukapwa zala.”—Luka 21:11.
Vyanga vyeji kulingisanga kupwenga zala. Kaha zala kana yeji kunehanga kuyanda nakufwa vize vili nakutesamo upolofweto wamuMbimbiliya.—Kusoloka 6:6, 8.
Vyuma vinalingisa vyanga vivulileko chikuma
Mbimbiliya yahanjika vyuma vili nakulingisa vyanga vivulileko. Yamba ngwayo:
“Mutu katwama nangolo jakulitwaminyina iveneko.”—Yelemiya 10:23.
Mazu kana alumbununa nge vatu kaveshi kuhasa ‘kulitwaminyina vavene’ chipwe kuliyulako. Kuhona kuzachisa kanawa vyuma chili nakulingisa kupwenga vyanga nakukeha chameya.
Vaka-sayasi vavavulu vamba ngwavo vyuma vali nakulinga vatu vili nakulingisa kuzume chikuma chize chinakuneha vyanga mukaye kosena.
Chipululu nakuhona kushinganyeka havyuma navikasoloka kulutwe, chili nakulingisa vatu venyeke vyuma vyakusoka hamavu, nakupihisa peho, nakuzachisa vyuma vyakutenga mujila yayipi nakulingisa nawa kuhone kupwa meya amavulu.
Chipwe ngocho Mbimbiliya yatuhana lutalililo.
Uno kulutwe vyuma navikawaha tahi?
Mbimbiliya yatushika ngwayo Kalunga mwakafumisako ukalu wosena uze uli nakulingisa kuhone kupwa meya amavulu. Mujila muka?
1. Kalunga mwakenyeka “vaze veji kwenyekanga mavu.” (Kusoloka 11:18) Mwakafumisako vatu vaze veji kulinganga vyuma vize vyeji kulingisanga kuhone kupwa meya amavulu.—WaChimoteu 2, 3:1, 2.
2. “Hamavu aumu nahakapwanga vijiva vyameya.” (Isaya 35:1, 6, 7) Kalunga mwakawahisa vyuma vyosena vize vinalyenyeka mwomwo yavyanga nakulingisa yino pulaneti kupwa palachise.
3. “Weji kuzakamanga mavu hakuwalingisa apwenga nawilo nakwima vyuma vyavivulu chikuma.” (Samu 65:9) Omu Kalunga mwakakisula ano mavu, nakukapwa kulya chachivulu nameya amwaza.