Surasak Suwanmake/Moment via Getty Images
TONENUNGA!
Kuzuma Chikuma muNgonde yaNonga mu 2023—Vyuma Muka Yahanjika Mbimbiliya?
Vatu mukaye vali nakulipika nakuzuma chikuma naukalu weka uze weji kwizanga mwomwo yakuzuma. Ivwa mijimbu yimwe yino:
“Hamyaka 174 yinahichino, uno mwaka hakiko kunazumu chikuma mukaye kosena.”—National Oceanic and Atmospheric Administration, U.S. Department of Commerce, July 13, 2023.
“MuItaly, namuSpain, namuFrance, namuGermany namuPoland vali nakumona ukalu wakuzuma chikuma. Chakutalilaho halitungu lyaSicily naSardinia hali nakuzuma chikuma kuheta ku 48°C [118°F], kaha kanda kuzumengaho lyehi ngana muEurope.”—European Space Agency, July 13, 2023.
“Omu peho yili nakuzuminako chikuma hapulaneti yetu, chili nakusoloka nge nakupwanga jivula jajinene jize najikalingisa kukapwe mavaji amanene.”—Stefan Uhlenbrook, mukulwane uze atala vyameya wamuliuka lyaWorld Meteorological, July 17, 2023.
Uno kuvula chamijimbu kaneyi yakutalisa kukuzuma yili nakukulingisa ulizakamine tahi? Ivwa vyuma yahanjika Mbimbiliya hachihande kanechi chachinene.
Uno kuzuma chikuma chili nakutesamo upolofweto wamuMbimbiliya tahi?
Eyo. Kuzuma chikuma naukalu weka uze uli nakwiza mwomwo yakuzuma chikuma, vinalitombola navyuma vize Mbimbiliya yahanjikilile chimweza ngwayo navisoloka mumakumbi ano. Chakutalilaho, Yesu apolofwetele ngwenyi natukamonanga “vyuma vyakwivwisa vatu woma.” (Luka 21:11) Kuzuma chikuma chinalingisa vatu vavavulu valizakamine ngwavo vatu navenyeka ano mavu.
Uno ano mazu navakawenyeka nakuheta haseteko yakuhona kuyoyelaho tahi?
Nduma. Kalunga atengele ano mavu kupwa limbo lyetu lyahaya myaka, shikaho keshi kwechelela vatu vawenyekeko. (Samu 115:16; Muka-kwambulula 1:4) Atushika ngwenyi “[mwakenyeka] nawa vaze veji kwenyekanga mavu.”—Kusoloka 11:18.
Mbimbiliya yasolola ngwayo Kalunga atwama nangolo jakukinga ano mavu kukala vyuma vize vinahase kuwenyeka, kaha mwakalingamo chikupu.
“[Kalunga] eji kuunjisanga nyamanganda. Makimba akalungalwiji eji kutulanga.” (Samu 107:29) Kalunga atwama nangolo jakuhonesa vyuma vize vinahase kwenyeka ano mavu. Ngocho mwakafumisako vyuma vize vili nakulingisa kuzume chikuma nakuyanjisa vatu.
“Weji kuzakamanga mavu hakuwalingisa apwenga nawilo nakwima vyuma vyavivulu chikuma.” (Samu 65:9) Kalunga mwakalingisa ano mavu kupwa palachise.
Nge uli nakusaka kulinangula vyavivvulu halushiko lwamuMbimbiliya lwakuwahisa vyuma, tala chihande chakwamba ngwavo, “Iya Mwayovola Mavu?”