KAPENI YAKWANUKA KUFWA CHAMWATA
Yesu Mwakakumisa Uhwanga
Yesu atachikiza omwo cheji kwivwakananga kuyanda mwomwo yauhwanga nakuhengesa chiyulo. Vamuvangijikilile, nakumuveta chakuzeneka mulonga, nakumusopesa mujila yakuhenga, nakumuwanyina milonga, nakumujiha mujila yayipi. Numba tuhu kapwile namulongako, oloze alisuwile kwecha “mwono wenyi kupwa ndando yakusokola vavavulu.” (Mateu 20:28; Yowano 15:13) Oholyapwa apwa jino Mwangana waWangana waKalunga, kaha kalinwomu afumiseko vaka-kuhengesa chiyulo hamavu hosena, nakukumisa uhwanga mangana ukahone kupwako cheka.—Isaya 42:3.
Mbimbiliya yahanjika omwo kaye nakakapwa nge Yesu naputuka lyehi kuyula, ngwayo:
“Vaka-kuhuka kaveshi kupwako chekako. Naukatalatala kuze vapwanga, oloze kaveshi kukapwakoko. Oloze vavavwovu navakaheta mavu, kaha navakalivwisa kuwaha kuunda chamwenemwene.”—Samu 37:10, 11.
Uno natusolola ngachilihi kusakwilila chetu havyuma vyosena atulingila Yesu navize mwakatulingila kulutwe? Ngana muze vasoneka hali Luka 22:19, Yesu alwezele vaka-kumukavangiza vanukenga kufwa chenyi. Echi chikiko Vinjiho jaYehova veji kulikungulwilanga hamwe mwaka himwaka halikumbi lyakwanuka kufwa chenyi. Tuli nakumisanyika mukeze kuchilika chaKwanuka Kufwa chaMwata lyaSondo, ha 24 March, 2024.