Kuzanga Kalunga navatu chikiko cheji kulingisanga Vinjiho jaYehova vambulile vatu vosena mujimbu wamuMbimbiliya, kuhakilako navatu vaze vavalwezele hakavanga ngwavo, “Ami kangwazangileko.” (Mateu 22:37-39) Kuzanga Kalunga cheji kutulingisanga twononoke lushimbi lwaMwanenyi lwakwamba ngwavo twatela “kuhana unjiho.” (Vilinga 10:42; WaYowano 1, 5:3) Kahechi cheji kutukafwanga twambulile vatu mujimbu waKalunga mapapa kakavulu ngana muze valingilenga vapolofweto jaKalunga vakushikulu. (Yelemiya 25:4) Hakuwana nge twazanga vatu, shikaho twafwila kwambulila vatu vosena “mujimbu wamwaza waWangana,” kuhakilako vene navatu vaze veji kuvapwile vakuwahilila hakavangako.—Mateu 24:14.

 Kakavulu tweji kuwananga vatu vakuwahilila hakukindulukila hamembo aze katwawanyine vatu vakuwahililako. Talenu havyuma vino vitatu:

•   Vatu veji kwalukanga.

•   Vatu vamwe vahamembo kana veji kufwilanga kwivwa mujimbu wamwaza.

•   Vatu veji kwalumukanga. Vyuma vinakusoloka mukaye naukalu wamukuyoya vinahase kulingisa mutu ‘asake vyuma vyakushipilitu’ nakufwila kwivwa mujimbu wamuMbimbiliya. (Mateu 5:3) Vatu vaze vakanyine kuvambulila hakavanga navakiko vanahase kwalumuna muchima ngana muze alingile kaposetolo Paulu.—WaChimoteu 1, 1:13.

 Chipwe ngocho, katwashinjila vatu kwivwilila kumujimbu wetuko. (WaPetulu 1, 3:15) Twatachikiza ngwetu mutu himutu atela kulisakwila ivene kwivwilila kuli Kalunga chipwe chiku.—Lushimbi lwamuchivali 30:19, 20.