Etu Vinjiho jaYehova katwalinga vilika vyamakumbi akusemukako mwomwo twatachikiza ngwetu vyeji kwivwisanga Kalunga kupihya kumuchima. Numba tuhu Mbimbiliya kayakanyisa hatoma kulinga vilika vyamakumbi akusemukako, oloze yatukafwa tutachikize vyuma vyaliweza mumakumbi kana nomwo Kalunga avimwenamo. Tushimutwilenu havyuma viwana vyakutalisa kumakumbi kana najindongi jimwe jamuMbimbiliya.

1.   Vilika vyamakumbi akusemuka vyafuma kuvatu vakuzeneka kwitava. Ndikishonali yimwe yize yahanjika havisemwa vyavatu [Funk & Wagnalls Standard Dictionary of Folklore, Mythology, and Legend] yamba ngwayo, vatu valingilenga vilika kana kunyima mwomwo yakufwelela ngwavo halikumbi lyakusemuka chamutu, “vashipilitu vavapi navaka-kole veji kusakanga kulukuka uze nasemuka. Ngocho vatu vaze vanakunguluka nakukisula navamukisula navimukinga.” Mukanda uze wahanjika hamakumbi akusemuka [The Lore of Birthdays] wamba ngwawo: “Vatu kushikulu vamwenenga mijimbu yalikumbi lyakusemuka chamutu kupwa yayilemu chikuma nakuyizachisa mangana vatachikize chiyoyelo chamutu chakulutwe kuzachisa vatanganyika.” Ou mukanda wahanjika nawa ngwawo: “Vatu vazachishilenga jikandulu javisava halikumbi lyakusemuka chamutu mangana vamukisule.”

    Chipwe ngocho, Mbimbiliya yakanyisa visava, nakutaha jingombo, nakupanda chipwe vyuma vyeka vyakufwana ngana. (Lushimbi lwamuchivali 18:14; Wavaka-Ngalesha 5:19-21) Kushikulu, Kalunga ahungile nganda yaMbavilone mwomwo vatu vamunganda kana vazachishilenga vatanganyika, kulumbununa nge vatahilenga. (Isaya 47:11-15) Numba tuhu Vinjiho jaYehova kavatachikiza kwafuma visemwa vyosenako, oloze veji kukavangizanga vyuma vatuhuhumuna muVisoneka kutalisa kuvisemwa vimwe.

2.   Vaka-Kulishitu vakulivanga kavalingilenga vilika vyamakumbi akusemukako. Mukanda waThe World Book Encyclopedia wamba ngwawo: “Vamwenenga chilika chakwanuka likumbi lyakusemuka kupwa hichilika chize chafuma kuvatu vaze kavalemesa Kalungako.” Mbimbiliya yasolola ngwayo, vaposetolo navatu veka vaze anangwilenga Yesu vasela vaka-Kulishitu chakutalilaho chamwaza chize vatela kukavangiza.—Wavaka-Tesolonyika 2, 3:6.

3.   Vaka-Kulishitu veji kwanukanga likumbi afwile Yesu keshi likumbi asemukileko. (Luka 22:17-20) Katwatela kulikomokela hachuma kanako mwomwo Mbimbiliya yamba ngwayo, “likumbi lyakufwa linawahe kuhambakana likumbi lyakusemuka.” (Muka-kwambulula 7:1) Yesu atungile lijina lyamwaza kuli Kalunga swi nakumakumishilo akuyoya chenyi chahano hamavu, shikaho echi chalingisa likumbi afwile kupwa lyalilemu kuhambakana likumbi lize asemukile.—WavaHepeleu 1:4.

4.   Mbimbiliya kayavuluka ngamba yaKalunga umwe alingaho lyehi chilika chalikumbi lyakusemukako. Echi kachalumbununa nge yahona kaha kumuvulukako, mwomwo yavuluka mijimbu yavatu vavali valingile vilika vyakusemuka vaze kavazachililenga Kalungako. Chipwe ngocho, havilika kana hasolokele vyuma vyavipi chikuma. Kuputuka 40:20-22; Mako 6:21-29.

 Visemi vaVinjiho veji kusolwelanga vana vavo zangi lwola lwosena, kaha nawa veji kuvahananga mawana nakushikamanga navo hamwe hakupwa visemi vamwenemwene. Veji kulondezezanga chakutalilaho chaYehova uze eji kuhananga vana venyi vyuma vyamwaza namuchima wakusuuluka. (Mateu 7:11) Shikaho vana vaVinjiho kavaliveya hachuma kanako nganomu yinasolola mijimbu yinakavangizaho:

•   “Cheji kwivwisanga kuwaha kutambula wana halwola luze kawapwanga nakushinganyeka ngwove muutambulako.”—Tammy, wamyaka yakusemuka 12.

•   “Numba tuhu kangwatambula wana halikumbi ngwasemukileko, oloze visemi jami veji kunguhanga wana hamakumbi eka. Ngweji kuwahililanga kunguhanawo mujila kana mwomwo veji kungukomwesanga.”—Gregory, wamyaka yakusemuka 11.

•   Eric, wamyaka yakusemuka 6 ambile kuli naye yamukwavo muka-shikola ngwenyi: “Munashinganyeka ngwenu minyutu likumi, natuvindanda twatundende, namwaso umwe chikiko chiwanyino vene ocho nyi? Mukeze kuzuvo yami mukamone omwo chapwa chiwanyino chivene!”