Jila tweji kulingilangamo vipeji vyetu, yapendamina hakunangula chamuMbimbiliya kaha nawa mwaliweza navyuma vyakufwana nge:

•   Chapwa kutamo kulishona hali kausoko ketu uze nafu. Tumbaji twaYesu navakiko valishonenenga hali vausoko wavo vaze vafwile. (Yowano 11:33-35, 38; Vilinga 8:2; 9:39) Ngocho, katwamona vipeji kupwa vilika chipwe lwola lwakulihizumunako. (Muka-kwambulula 3:1, 4; 7:1-4) Oloze elu lwapwa hilwola lwakusolola muchima wakeke.—Wavaka-Loma 12:15.

•   Vafu kavatachikiza chuma numba chimweko. Chamokomoko nachisemwa chipwe chiyoyelo chetu, tweji kulihendanga kuvilika navisemwa vize kavyatwama muvisonekako vize vyahanjika ngwavo vafu vanahase kulemeka chipwe kukafwa vavatonyi. (Muka-kwambulula 9:5, 6, 10) Havisemwa haliweza visemwa vyakufwana nge kunyingama havipeji, nakuka mukulu, nakuhanjika navafu navilika vyeka vize veji kuhundangananga havipeji. Tweji kulihendanga kuvilika navisemwa kana mwomwo twononoka lushimbi lwamuMbimbiliya lwakwamba ngwavo: “Lihandununenuko, . . . kaha kanda namukwata kuchuma chimwe chachipiko.”—Wavaka-Kolinde 2, 6:17.

•   Vafu navakasanguka. Mbimbiliya yatunangula ngwayo vafu navakasanguka, kaha lwola kana kakweshi kukapwa cheka kufwako. (Vilinga 24:15, Kusoloka 21:4) Lutalililo kana lwatukafwa tuhonenga kuhomba chikuma ngana muze chapwile kuli vaka-Kulishitu vamulikulukaji lyamyaka yakulivanga.—Wavaka-Tesolonyika 1, 4:13.

•   Mbimbiliya yatulweza tupwenganga vakulikehesa. (Vishimo 11:2) Twatachikiza ngwetu havipeji keshi ‘hakutembesela’ vyuma chipwe jimbongo watwama najo mutuko. (WaYowano 1, 2:16) Katwalinga vipeji vyauhando vize vyeji kukomwesanga vatu chipwe kulanda jipongishi jauhando chipwe kuvwala uvwalo wandando yayineneko.

•   Katwasaka kushinjila vakwetu vakavangize vyuma twafwelela kutalisa kuvipejiko. Ngocho tweji kukavangizanga lushimbi lwakwamba ngwavo: “Etu tuvosena mutu himutu mwakalyambulula ivene kuli Kalunga havilinga vyenyi.” (Wavaka-Loma 14:12) Shikaho kachi nge tunakusaka kulumbunwina vatu vyuma twafwelela, tweji kulinganga ngocho “namuchima wauvwovu nakalemesa.”—WaPetulu 1, 3:15.

 Chihela: Tanga yinahase kusakula chihela nakupwila chipeji, chinahase kupwila haZuvo yaWangana, chipwe hazuvo yachipeji, chipwe kuchihela cheka, chipwe kumafuka.

 Chihande chachipeji: Chihande chachipeji veji kuhanjikanga mangana chivendejeke vaze vanafwisa hakulumbununa vyuma yahanjika Mbimbiliya kutalisa kukufwa nakulutalililo lwakusanguka. (Yowano 11:25; Wavaka-Loma 5:12) Muchihande kana cheji kuhanjikanga nawa havilinga vyamwaza vize apwile navyo uze nafu navyuma navalinangulako vaze vanasale.—Samwele 2, 1:17-27.

 Veji kwimbanga nawa mwaso unazame haVisoneka. (Wavaka-Kolose 3:16) Kaha chihande veji kuchikukululanga nakulomba.—Wavaka-Fwilipi 4:6, 7.

 Kufwetesa jimbongo: Katwafwetesa vatu vaze veji kwizanga kukala kukunguluka chetu kuhakilako vene nakuvipeji chipwe kukukunguluka chakuZuvo yaWanganako.—Mateu 10:8.

 Vatu veji kupwangako: Vatu vaze kavapwa Vinjihoko vanahase kwiza kuvipeji vize vyeji kupwilanga haZuvo yaWangana ngana muze veji kwizanga kukukunguluka chetu chosena.

 Chinjiho hiChinjiho nahase kulisakwila yivene kuya kuchipeji kweseka nachivezu chenyi chize vanangula naMbimbiliya. (WaChimoteu 1, 1:19) Chipwe ngocho, katwazana muvilika vyavaka-kwitava vize vyalimbalaka naMbimbiliyako.—Wavaka-Kolinde 2, 6:14-17.