Etu Vinjiho jaYehova twafwila kulingisa jitanga jetu najitanga javakwetu jilinunge. Twavumbika chikuma Kalunga Tengi yetu uze ahakako tanga. (Kuputuka 2:21-24; Wavaka-Efwesu 3:14, 15) Yehova ahana jindongi jize jatwama muMbimbiliya mangana jihase kukafwa vatu mukaye kosena vazamise malo avo nakupwa vakuwahilila.

 Twafwila kukavangiza vyuma tweji kulinangulanga muMbimbiliya, mwomwo vyeji kutukafwanga tupwenga Malunga, namapwevo, navisemi vamwenemwene. (Vishimo 31:10-31; Wavaka-Efwesu 5:22–6:4; WaChimoteu 1, 5:8) Jindongi jamuMbimbiliya jeji kukafwanga navatu mujitanga vaze vatwama mukwitava chakulihanduna handununa vafukile. (WaPetulu 1, 3:1, 2) Achitalenu mazu vahanjikile vatu vamwe vaze kavapwa Vinjihoko, vaze vakwechi vaka-mahyavo vaze valumukile nakupwa jino Vinjiho jaYehova:

•   “Kufuma hakulimbata, twalikokojwesele chikuma hatukweji 6. Oloze omu puwami Ivete alumukile nakupwa Chinjiho chaYehova apwile navilinga vyamwaza vyakufwana nge, zangi namuchima wakutalilila chikoki. Kwalumuka chenyi chalingishile ulo wetu uhone kufwa.”—Clauir, wakuBrazil.

•   “Omu lunga lyami Chansa aputukile kulinangula Mbimbiliya naVinjiho jaYehova ngwapihililile chikuma mwomwo ngwashinganyekelenga ngwami Vinjiho jaYehova veji kulingisanga jitanga jilihandunune. Oloze kutwala muze ngwamwene ngwami Mbimbiliya yatukafwile chikuma muulo wetu.”—Agness, wamuZambia

 Tweji kukafwanga vatu mumulimo wakwambulula vakavangize chinyingi chamuMbimbiliya chize chinahase kuvakafwa

•   Vasakule kanawa mutu wakwingila nenyi muulo

•   Vafukile mumwaka watete muulo

•   Vatwamenga kanawa navaka-ulo wavo

•   Vatachikize kanawa mwakuzachishila jimbongo

•   Vahonenga kulikokojwesa

•   Valikonekelenga navaka-mahyavo

•   Vanangulenga kanawa vana vavo

 Eyo, lwola lumwe chinahase kuneha vikokojola. Chakutalilaho, omu kapani yaSofres yahehwojwele mu 1998, yawanyine nge Vinjiho vamwe vaze vasomboka chipwe kumbata mutu uze kapwa Chinjihoko veji kupwanga naukalu muulo wavo.

 Yesu ahanjikilile chimweza ngwenyi, vatu vaze navakavangiza vyuma vize anangwilenga navapwanga naukalu mujitanga lwola lumwe. (Mateu 10:32-36) Will Durant uze alinangula vyakushikulu ambile ngwenyi, muWangana wavaLoma “kwitava chavaka-Kulishitu vachiwanyine namulonga wakuhandununa jitanga,” a naVinjiho jaYehova vamwe makumbi ano vali nakuvawana namulonga woumwe. Uno chikupu vene Vinjiho vakiko vali nakulingisa jitanga jilihandunune tahi?

 Omu Vinjiho jaYehova vavahanyine mulonga wakuhandununa jitanga, Zango Yayinene yamuEurope Yize Yatala haLisesa Vatwama Nalyo Vatu yavatwile chihande kana ngwayo, “vaka-tanga yavaze kavapwa Vinjihoko vakiko veji kunehanga ukalu mutanga. Veji kulinganga ngocho hakuhona kwitavila nakuvumbika vyuma vafwelela vausoko wavo vaze vapwa Vinjiho nakuvakanyisa vahone kulinga vyuma vafwelela mukwitava chavo.” Zango yambile cheka ngwayo: “Ukalu kana watwama mujitanga josena muze mwatwama vatu vamukwitava chakulisezaseza, kuhakilako vene naVinjiho jaYehova.” b Numba tuhu jitanga jili nakumona ukalu kanou, oloze Vinjiho jaYehova veji kukavangizanga mazu amuMbimbiliya akwamba ngwavo: “Kanda namuhilwisa upi kumutu namilingi mwamupiko. . . . Kachi nge chinahase, kweseka nomu namuhashila, twamenunga mukuunda navatu vosena.”—Wavaka-Loma 12:17, 18.

 Vinjiho jaYehova veji kukavangizanga lundongi lwamuMbimbiliya lwakumbata nakusombokela “muli Mwata kaha,” kulumbununa mutu uze atwama nalufwelelo lwolumwe. (Wavaka-Kolinde 1, 7:39) Lundongi kana lwapwa lwamuMbimbiliya kaha nawa lweji kukafwanga vatu vosena. Chakutalilaho, mangazini yakwamba ngwavo Journal of Marriage and Family yamu 2010, yamba ngwayo: “Vaka-kulimbata vaze vafwelela vyuma vyovimwe” veji kufukilanga muulo. c

 Chipwe ngocho, Vinjiho kavakolezeza vakwavo valihandunune navaka-mahyavo vaze kavapwa Vinjihoko. Mbimbiliya yamba ngwayo: “Kachi nge ndumbwetu umwe ali napwevo lyenyi uze ketavako, oloze uze pwevo netavila kutwama nenyi, kaha lunga kanda akaseza uze pwevo lyenyiko. Kachi nge pwevo ali nalunga lyenyi uze ketavako, oloze uze lunga netavila kutwama nenyi, kaha kanda akaseza uze lunga lyenyiko.” (Wavaka-Kolinde 1, 7:12, 13) Shikaho, Vinjiho jaYehova veji kukavangizanga lushimbi kana.