•  Uno Vinjiho jaYehova veji kutachikizanga ngachilihi numba nge chiwanyino chalikumbi lyakunoka vachitavila kuli Kalunga?

•  Uno chikupu Vinjiho jaYehova vazanga vausoko wavo numba tuhu kavazana muviwanyino vyamakumbi amwe akunokako tahi?

•  Uno Vinjiho jaYehova veji kulwezanga vakwavo valitwamine kwazana muviwanyino vyamakumbi amwe akunoka tahi?

 Vinjiho jaYehova veji kuvangilanga kukekesa muMbimbiliya shimbu kanda vasakule kulinga chiwanyino chalikumbi lyakunoka. Viwanyino navilika vimwe vyalimbalaka najindongi jamuMbimbiliya. Kachi nge viwanyino navilika kana vinalimbalaka najindongi jamuMbimbiliya, kaha Vinjiho jaYehova kaveshi kwazanamoko. Kutalisa kuviwanyino vyamakumbi eka akunoka, Chinjiho hiChinjiho eji kulisakwilanga ivene mangana apwenga “nachivezu chitoma kumeso aKalunga nakumeso avatu.”—Vilinga 24:16.

 Vihula vinakavangizaho vikiko veji kulihulisanga Vinjiho jaYehova shimbu kanda vamone numba nge vatela kwazana muviwanyino vyamakumbi akunoka chipwe chiku. a

•   Uno eli likumbi lyakunoka lyazama hajindongi jamuMbimbiliya tahi?

   Lundongi lwamuMbimbiliya: “‘Fumenu muli vakiko, lihandununenuko,’ omu mukiko mwanambe Yehova, ‘kaha kanda namukwata kuchuma chimwe chachipiko.’”—Wavaka-Kolinde 2, 6:15-17.

   Hakusaka valihende kukunangula chamakuli chize chalimbalaka naMbimbiliya, Vinjiho jaYehova kavazana muviwanyino vyamakumbi akunoka muze mwaliweza vyuma vino vanavuluka mwishi.

   Makumbi akunoka aze afuma mukwitava chamakuli chipwe kukulemesa tulunga vamakuli. Yesu ambile ngwenyi: “Lemesanga Yehova Kalunga kove, ikiye kaha watela kuzachilanga mulimo wajila.” (Mateu 4:10) Kweseka namazu kana, Vinjiho jaYehova kavazana muviwanyino vyamakumbi akunoka vyakufwana nge kulisimasi, naIshita, chipwe May Dayko, mwomwo viwanyino kana vyakundwiza kulemesa tulunga vamakuli muchishishisa chakulemesa Yehova. Kaha nawa Vinjiho kavazana muviwanyino vyakufwana nge vinoko:

  •  Kwanzaa. Lijina lyakwamba ngwavo Kwanzaa “lyafuma kumazu amuchiSwahili akwamba ngwavo matunda yakwanza, kulumbununa ‘jimbuto jatete.’ Shikaho echi chalumbununa nge viwanyino kana vyafuma kujimbuto jize valivangilenga kwaha vavuluka mumijimbu yamuAfrica.” (Encyclopedia of Black Studies) Numba tuhu vatu vamwe vamona chiwanyino chaKwanzaa ngwavo kachapandama kumauka akwitavako, oloze mukanda waEncyclopedia of African Religion wafwanyisa chiwanyino kana kuchiwanyino chamuAfrica chize veji kulinganga vatu hakuhana “jimbuto jatete kutulunga nakuvakakuluka mangana vasolole kusakwilila chavo.” Mukanda kana wambile nawa ngwawo: “Yapwile nawa jila yimwe yakusolola kusakwilila chavo hakuyoya chamwaza chize vavashika vakakuluka javo. Aha hakiko hazama chiwanyino chalikumbi lyakunoka valuka ngwavo African American holiday, Kwanzaa.”

  •  Mid-Autumn Festival. “Echi chapwa chiwanyino chakuvumbika kalunga wapwevo wakakweji.” (Holidays, Festivals, and Celebrations of the World Dictionary) Hakulinga chiwanyino kana, “mapwevo veji kuchikulukanga nakulifukula kuli ou kalunga wapwevo. Mulilimi lyaChinese, echi kuchikuluka vachivuluka ngwavo kowtow.”—Religions of the World—A Comprehensive Encyclopedia of Beliefs and Practices.

  •  Nauruz (Nowruz). “Chiwanyino kana chafuma kukwitava chaZoroastrianism, kaha likumbi lyachilika kana valimwene kupwa lyajila chikuma kuli vaZoroastrian. . . . Kweseka nachisemwa chavaZoroastrian, Shipilitu yaMusana yize vavulukilenga ngwavo [Rapithwin], vayishinjikililenga mumavu mungonde yachishika, kaha yejilenga cheka namusana halikumbi lyaNowruz.”—United Nations Educational, Scientific and Cultural Organization.

  •  Shab-e Yalda. Mukanda waSufism in the Secret History of Persia wamba ngwawo, chiwanyino kanechi veji kuchilinganga muDecember, kaha hakulinga chiwanyino kana “veji kulemesanga Mithra” uze apwa kalunga wamusana. Vatu vamwe vamba ngwavo, chiwanyino kanechi chalifwanako nachize veji kulingilanga tulunga vamusana vavaLoma navavaHelase. b

  •  Kuhana wana wakusakwilila. Ngana mwachiwanyino chaKwanzaa, echi chiwanyino kana chafuma kuvilika vyakwaha jimbuto vyakushikulu vize vyavumbikilenga tulunga vamakuli. Mukuhita chalwola, “vaka-Kulishitu navakiko vaputukile kulinga viwanyino kana.”—A Great and Godly Adventure—The Pilgrims and the Myth of the First Thanksgiving.

   Makumbi akunoka aze afuma mukupanda chipwe mukufwelela mukalunga wakutokwa. Mbimbiliya yamba ngwayo “vaze vanalongesela kalunga waKutokwa mesa” vatwama “hali vatu vaze vanaseze Yehova.” (Isaya 65:11) Shikaho, Vinjiho jaYehova kavazana muviwanyino vyamakumbi akunoka akufwana nge ano:

  •  Ivan Kupala. Mukanda waThe A to Z of Belarus wamba ngwawo, “vatu vavavulu vafwelela ngwavo, hakulinga chiwanyino chaIvan Kupala vyuma vyakutenga vyeji kulovolanga ngolo jakukomwesa, shikaho nge mutu apwa wakuhamuka kaha nawa nge natokwa, nahase kupwa nangolo kana.” Hakavanga chiwanyino kana vachilingilenga muJune. Kaha nawa mukanda waEncyclopedia of Contemporary Russian Culture wambile ngwawo, “omu vatu vamukwitava chamakuli vaputukile kupwa vaka-Kulishitu, chiwanyino kana vachilingililenga hamwe nachiwanyino chaChachi chize valingilenga hakwanuka Yowano Muka-kumbapachisa.”

  •  Lunar New Year (Chiwanyino chaMwaka Wauhya chamuChina chipwe muKorea). “Halikumbi kana, jitanga, namasepa navausoko veji kuhananga kavumbi tulunga navashipilitu mangana ngwavo vavakisulu mumwaka wosena.” (Mooncakes and Hungry Ghosts—Festivals of China) Kaha nawa chiwanyino vavuluka ngwavo Korean New Year “mwaliweza kulemesa vakakuluka, nakufumisa vashipilitu vakuhuka, nakulingisa vatu vapwenga vakutokwa muMwaka Wauhya, nakutaha vatachikize vyuma navipwa muMwaka Wauhya.”—Encyclopedia of New Year’s Holidays Worldwide.

   Makumbi akunoka aze azama hakunangula chakwamba ngwavo mwono kawafwako. Mbimbiliya yahanjika hatoma ngwayo mwono weji kufwanga. (Ezekele 18:4) Shikaho Vinjiho jaYehova kavazana muviwanyino vyamakumbi akunoka vanavuluka mwishi vize vyakundwiza kunangula chakwamba ngwavo mwono kawafwako.

  •  Likumbi lyaVatu Vosena (Likumbi lyaVafu). Halikumbi kana “vatu veji kwanukanga vafu vakushishika vosena,” mukiko wahanjika mukanda waNew Catholic Encyclopedia. “Kufuma mu 500 C.E, nakuheta mu 1500 C.E, vatu vavavulu vafwelele ngwavo, vatu vapwilenga mupakatole vasolokelenga halikumbi kana mumijimu, namumisalu, namuvyuma vyeka kuli mutu uze avalingile mwamupi.”

  •  Chiwanyino chaQingming (Ch’ing Ming) nachaMujimu waMatoto. Viwanyino kana veji kuvilinganga mangana vavumbike vakakuluka javo. Mukanda waCelebrating Life Customs Around the World—From Baby Showers to Funerals, wamba ngwawo, hachiwanyino kana veji “kwochanga vyakulya, navyakunwa najimbongo jamapapilo mangana vafu vahone kwivwa zala, nalipwila nakuhona jimbongo.” Ou mukanda wahanjika nawa ngwawo: “Hachiwanyino chaMujimu waMatoto, chikumanyi halwola luze kakweji eji kupwanga hamulungu vatu vaze veji kulinganga viwanyino kana veji kufwelela ngwavo vatu vaze vanafu navaze vavatonyi veji kulivwasananga chikuma halwola kana, ngocho chapwa chachilemu kufwila kuvasuulwisa vatu navakakuluka.”

  •  Chuseok. Mukanda waThe Korean Tradition of Religion, Society, and Ethics, wamba ngwawo, halikumbi lyachiwanyino kana vatu veji “kuhananga vafu vyakulya navinyo.” Kuhana vyuma kana cheji kusololanga nge “vafwelela ngwavo vatu kana vachili lika nakuyoya.”

   Makumbi akunoka aze akundwiza kupanda. Mbimbiliya yamba ngwayo: “Muka-kutaha ngombo, chipwe muka-kulinga visava, chipwe muka-kutahisa vitaho, chipwe muka-kupanda, chipwe muka-kuhelama vakwavo, chipwe muka-kutahisa vashipilitu, chipwe muka-kulweza vyuma vyakulutwe, chipwe muka-kwihula vafu . . . napu waunyengwe kumeso aYehova.” (Lushimbi lwamuchivali 18:10-12) Hakusaka Vinjiho jaYehova valihende kukupanda chipwe kukutahisa vatanganyika, kavazana muchilika chaHalloween chipwe vilika vanalave mwishiko.

  •  Sinhala and Tamil New Year. ‘Muchilika kana mwaliweza kulinga vyuma vimwe halwola luze vaka-kutahisa vatanganyika vamona ngwavo nalunehela vatu vyuma vyamwaza.’—Encyclopedia of Sri Lanka.

  •  Songkran. Lijina lyechi chiwanyino chamuAsia “lyafuma kulizu lyaSanskrit . . . kulumbununa ‘kunungwojoka’ chipwe ‘kwalumuka,’ kaha echi chiwanyino cheji kupwangako nge likumbi linalauka.”—Food, Feasts, and Faith—An Encyclopedia of Food Culture in World Religions.

   Viwanyino vize vyakundwiza kulemesa chamuJishimbi vahanyine Mose chize chakumine hakufwa chaYesu. Mbimbiliya yamba ngwayo: “Kulishitu ikiye napu kukuma chaJishimbi.” (Wavaka-Loma 10:4) Noholyapwa vaka-Kulishitu veji kunganyalanga kujindongi jamuJishimbi jaMose jize vahanyine vaIsalele kushikulu. Chipwe ngocho kavazana muviwanyino vize vyavuluka kwiza chaMeshiya uze vatachikiza vaka-Kulishitu ngwavo eza lyehiko. Mbimbiliya yamba ngwayo: “Vyuma kana vinapu muvwimbimbi wavyuma vize vyapwile nakwiza, oloze vyuma vivene vinapu vyakuli Kulishitu.” (Wavaka-Kolose 2:17) Hakuwana nge evi viwanyino tunavuluka nevi vinakavangizaho vyatesamo lyehi, kaha nawa mwaliweza vyuma vimwe vize vyalimbalaka navyuma yanangula Mbimbiliya shikaho Vinjiho jaYehova kavazanamoko.

  •  Hanukkah. Echi chiwanyino veji kuchilinganga mangana vakunjike cheka tembele yavaYuleya yamuYelusalema. Oloze Mbimbiliya yahanjika ngwayo, Yesu ejile nakupwa Kapilishitu Wakulitulaho “mumbalaka yayilemu [chipwe mutembele] yakukupuka chikuma yize kavatunga namavokoko, chipwe ngwetu yize kayeshi yakutenga hano hamavuko.” (WavaHepeleu 9:11) Vaka-Kulishitu vamona ngwavo eyi tembele yakushipilitu yashishile tembele yivene yize yapwile muYelusalema.

  •  Rosh Hashanah. Rosh Hashanah lyapwa likumbi lyatete lyavaYuleya mumwaka. Kushikulu, chiwanyino kana chapwile chachilemu chikuma mwomwo vahanyinenga mawana amavulu kuli Kalunga. (Kulava 29:1-6) Oloze Yesu Kulishitu uze apwa Meshiya ‘afumishileko mulimo wakuhana mawana navimuna vakuvatula’ ngocho Kalunga kamona cheka kulinga vyuma kana kupwa vyavilemuko.—Ndanyele 9:26, 27.

•   Uno viwanyino kana vyakundwiza kulemesela hamwe Kalunga namauka eka tahi?

   Lundongi lwamuMbimbiliya: “Muka-kwitava mwalivwasanyina halihi namutu uze ketavako? Kaha chivwasano muka chili mukachi katembele yaKalunga namakombelo?”—Wavaka-Kolinde 2, 6:15-17.

   Numba tuhu Vinjiho jaYehova vafwila kutwama mukuunda navakwavo nakuvumbika lisesa lyavakwavo lyakulisakwila vyuma vatela kufwelela, oloze veji kulihendanga kukulinga viwanyino vize vyakundwiza kulemesela hamwe Kalunga namauka eka vyakufwana nge vino:

   Viwanyino vyakulemesa chifwanyisa chamukwitava chipwe vize vyakundwiza jichachi jakulisezaseza kulombela hamwe. Omu Kalunga atwalile vaIsalele mulifuchi lyalihya muze mwapwile vatu vaze valemeselenga tulunga vamakuli, avalwezele ngwenyi: “Kanda namukalikasa chivwasano navakiko chipwe natulunga twavoko. . . . Kachi nge namukazachila tulunga twavo, kaha nachikapwa muheto kuli enu.” (Kulovoka 23:32, 33) Shikaho Vinjiho jaYehova kavazana muviwanyino vyamakumbi akunoka vyakufwana nge vino:

  •  Loy Krathong. Hakulinga chiwanyino kana, “vatu veji kutunganga malonga amafwo aze eji kusolokanga nge mato nakuhakamo jikandulu chipwe mitondo yalivumba lyamwaza nakuwambila mumeya. Kaha kumbila malonga kana mumeya cheji kulumbununanga nge vanambili vyuma vyavipi vize vyasakanga kusolokela vatu. Viwanyino kana veji kuvilinganga mangana vanuke lungano lyajila aseza Buddha.”—Encyclopedia of Buddhism.

  •  Likumbi lyakulikonekela jishili. Kweseka namazu ahanjikile chilolo wafulumende aze atwama mulipapilo lyamijimbu lyaThe National, a Papua New Guinean, asolola nge “vatu vaze veji kwazananga muchiwanyino kana veji kufwelelanga vyuma vanangula vaka-Kulishitu.” Ou chilolo ambile nawa ngwenyi “kulinga chiwanyino kana cheji kukafwanga vatu vakavangize jindongi javaka-Kulishitu.”

  •  Vesak. “Hamakumbi aze vamona vaka-Buddha kupwa ajila, eli likiko likumbi lyajila chikuma. Veji kulinganga echi chiwanyino halikumbi kana mangana vanuke likumbi asemukile Buddha, nomu ejile nakupwa nachinyingi chikuma, nalikumbi afwile chipwe lize ayile muNirvana.”—Holidays, Festivals, and Celebrations of the World Dictionary.

   Viwanyino vize vyakundwiza visemwa vyamumauka akwitava vize kavavuluka muMbimbiliyako. Yesu alwezele vatwamina vamukwitava ngwenyi: “Munazeyesa mazu aKalunga mwomwo yavisemwa vyenu.” Avalwezele nawa ngwenyi kulemesa chavo chayilenga mwamokomoko mwomwo vanangwilenga “jishimbi javatu.” (Mateu 15:6, 9) Hakuwana nge veji kukavangizanga mazu kana awa akuhuhumuna, ngocho Vinjiho jaYehova kavazana muvilika vyavivulu vyamumauka akwitavako.

  •  Epiphany (Likumbi LyavaMyangana Vatatu, Timkat, chipwe Los Reyes Magos). Vatu veji kulinganga chiwanyino kana mangana vanuke likumbi lize vaka-kuzachisa vatanganyika vayile nakutala Yesu chipwe mangana vanuke lumbapachiso lwaYesu. Chapwa ‘chiwanyino chize vamona ngwavo chavaka-Kulishitu, oloze hakulinga chilika kana veji kulinganga vyuma vize vyakundwiza kulemesa chamakuli. Veji kuhananga kavumbi tulunga vatulwiji navijiva’ (The Christmas Encyclopedia) Kaha nawa chiwanyino chaTimkat nachikiko ‘chakundwiza chisemwa.’—Encyclopedia of Society and Culture in the Ancient World.

  •  Chiwanyino chakusolola nge Maliya ayile mwilu. Chiwanyino kanechi veji kuchilinganga hakwanuka naye yaYesu mwomwo ngwavo ayile mwilu namujimba wautu. Mukanda waReligion and Society—Encyclopedia of Fundamentalism wamba ngwawo “vaka-Kulishitu vakulivanga kavalingilenga chiwanyino kanako mwomwo kachafuma muVisonekako.”

  •  Chiwanyino chakusolola nge Maliya kapwile nashili kufuma halwola luze emichile. “Vishinganyeka kana kavyapwa vyamuVisonekako . . . Kunangula kana chapwa chamujiChachi.”—New Catholic Encyclopedia.

  •  Lent. Kweseka namukanda waNew Catholic Encyclopedia, echi chiwanyino chakulikonekela jishili nakulijilika kulya chaputukile ‘mulikulukaji lyamyaka lyakusokesa 4’ omu mwahichile myaka yakuzomboka 200 kufuma halwola vakumishile kusoneka Mbimbiliya. Ou mukanda wahanjikile nawa ngwawo halikumbi lyatete lyakulinga chiwanyino kana “halikumbi vavuluka ngwavo Ash Wednesday (Likumbi lyaChitatu lyaKulikwita Uto) vapilishitu veji kulifunjikanga vinjikizo vyakulusu hajiholo kuzachisa uto. Echi cheji kuvanukisanga ngwavo vatela kulikonekela jishili javo. Chilika kana vaputukile kuchilinga muChachi yaKatolika mu 1091.’

  •  Meskel (chipwe, Maskal). Mukanda waEncyclopedia of Society and Culture in the Medieval World wamba ngwawo echi chiwanyino chamuEthiopia, veji kuchilinganga mangana vanuke “omu vawanyine Kulusu Yivene (kulumbununa kulusu yize vasukikile Yesu), veji kulinganga ngocho hakuwika mutengatenga wakakahya nakuputuka kukina oku vali nakujinguluka kuze kukakahya.” Oloze Vinjiho jaYehova kavazachisa kulusu hakulemesa Kalungako.

•   Uno likumbi lyakunoka kana lyeji kutohwesanga mutu, chipwe liuka, chipwe chinjikizo chalifuchi tahi?

   Lundongi lwamuMbimbiliya: “Yehova nambe ngwenyi: ‘Weshowo mwafwelela vatu ou mwapendamina hangolo javatu, ou nawa mwalumuna muchima wenyi nakuseza Yehova apwenga wakwangula.’”—Yelemiya 17:5.

   Numba tuhu Vinjiho jaYehova veji kuvumbikanga vakwavo nakuvalombelako, oloze kavazana kuviwanyino vinoko:

   Makumbi akunoka akusolola nge vavumbika muka-kuyula chipwe mutu weka wamulemu. Mbimbiliya yamba ngwayo: “Litwaminenu kufwelela mutu, uze napu nge peho yakuhwima mumazulu. Mwomwo ikaze mumuhakila muchima?” (Isaya 2:22) Shikaho, Vinjiho jaYehova kavalinga viwanyino vyamakumbi akusemuka akufwana nge likumbi lyakusemuka lyamwangana chipwe lyalisano lyamwanganako.

   Chiwanyino chalipandelo. Vinjiho jaYehova kavalinga chiwanyino chakwanuka likumbi lifuchi lyaputukile kuzachisa lipandeloko. Mwomwo ika? Mwomwo Mbimbiliya yamba ngwayo: “Lihendenunga kumakombelo.” (WaYowano 1, 5:21) Makumbi ano, vatu vamwe kavamona kulifukula kulipandelo nge hikulemesa tuponyako. Oloze mutu alinangula chikuma Carlton J. H. Hayes asonekele ngwenyi: “Vatu vali nakulemesa chikuma lipandelo nakusolola nge vafwelela chikuma mulifuchi lyavo.”

   Makumbi akunoka chipwe viwanyino vyakuvumbika vatu vajila. Vyuma muka vyasolokele omu mutu uze evwilenga Kalunga woma asakile kulifukula kuli kaposetolo Petulu? Mbimbiliya yamba ngwayo: “Petulu amukatwile nakwamba ngwenyi: ‘Imana, nayami nawa ngumutu kaha.’” (Vilinga 10:25, 26) Hakuwana nge Petulu navaposetolo veka vakanyinenga kuvavumbika, ngocho Vinjiho jaYehova navakiko kavazana muviwanyino vyavumbika vatu vajila ngana muze navisolola viwanyino vino vinakavangizaho.

  •  Likumbi lyaVatu vaKujila Vosena. “Okwo kwafuma echi chiwanyino chakuvumbika vatu naumwe wauchi atachikizako.”—New Catholic Encyclopedia.

  •  Chiwanyino chaPwevo wamuGuadalupe. Chiwanyino kana cheji “kuvumbikanga mutu wajila wamuMexico,” uze vatu vamwe vafwelela ngwavo apwa Maliya naye yaYesu. Veji kwambanga ngwavo asolokele mujila yakukomwesa kuli njimi mu 1531.—The Greenwood Encyclopedia of Latino Literature.

  •  Likumbi lyaKuluka Lijina. Mukanda waCelebrating Life Customs Around the World—From Baby Showers to Funerals wamba ngwawo: “Likumbi lyakuluka lijina lyapwa hilikumbi lyachiwanyino chavatu vajila chize veji kulinganga hakuluka mwana lijina halwola navamumbapachisa chipwe halwola mwasolola lufwelelo lwenyi muchachi. Wamba nawa ngwawo: “Hakavanga vilika kana kavyapwile mumauka akwitavako.”

   Viwanyino vyamapolitiki. Mbimbiliya yamba ngwayo: “Chapwa chamwaza kuchinyina muli Yehova kuhambakana kufwelela vatu.” (Samu 118:8, 9) Vinjiho jaYehova kavazana muviwanyino vyakufwana nge Youth Day or Women’s Day vize vyakundwiza mapolitikiko, mwomwo viwanyino kana vyeji kulingisanga vatu vafwelele ngwavo vatu vakiko navakafumisako ukalu uli muno mukaye muchishishisa chakufwelela Kalunga. Echi chikiko cheji kuvalingisanga nawa vahone kwazana muchiwanyino chaEmancipation Day chipwe viwanyino vyeka. Vinjiho vafwelela ngwavo, Wangana waKalunga ukiko kaha naukafumisako ukalu wakulitala hamalimi nakulimona ulumbi.—Wavaka-Loma 2:11; 8:21.

•   Uno likumbi lyakunoka kana lyeji kuvumbikanga lifuchi limwe chipwe muyachi umwe kuhambakana ukwavo tahi?

   Lundongi lwamuMbimbiliya: “Kalunga katala vatu kumesoko, oloze muli vaka-miyachi yosena, ou eji kumwivwanga woma nakulinganga vyuma vyakwoloka, veji kumwitavilanga kuli Kalunga.”—Vilinga 10:34, 35.

   Numba tuhu Vinjiho jaYehova vazanga mafuchi avo, oloze kavazana muviwanyino vize vyeji kuvumbikanga lifuchi limwe chipwe muyachi ngana muze vanasolola mwishiko:

   Viwanyino vyakuvumbika maswalale. Muchishishisa chakwazana mujita Yesu alwezele vaka-kumukavangiza ngwenyi: “Zangenunga lika vaka-kole jenu nakulombelako vaze vali nakumiyanjisa.” (Mateu 5:44) Shikaho Vinjiho jaYehova kavazana muviwanyino vyakuvumbika maswalale ngana muze vinasolola vyakutalilaho vinakavangizahoko:

  •  Likumbi lyaAnzac. “Lizu Anzac lyemanyinako lizavu lyamaswalale vamuAustralia namuNew Zealand,” kaha “likumbi kana veji kulilinganga mangana vanuke maswalale vaze vafwile mujita.”—Historical Dictionary of Australia.

  •  Likumbi lyaMaswalale (Likumbi lyakwanukilaho, Likumbi lyakwanukilaho lyaSondo, chipwe Likumbi lyaKwanuka Kufwa chaVatu). Viwanyino kana veji kuvilinganga mangana vanuke maswalale vaze vafwile mujita.—Encyclopædia Britannica

   Chiwanyino chalikumbi vatambwile chiyulo mulifuchi (independence). Yesu ahanjikile kutalisa kuli vaka-kumukavangiza ngwenyi: “Vakiko kaveshi vakukayeko, nganomu ngwazeneka ami kupwa nguwakukaye.” (Yowano 17:16) Numba tuhu Vinjiho jaYehova vafwila kutachikiza mujimbu walifuchi lyavo, oloze kavazana muviwanyino vyakufwana nge:

  •  Likumbi lyamuAustralia. Mukanda waWorldmark Encyclopedia of Cultures and Daily Life wamba ngwawo, chilika kana veji kuchilinganga mangana vanuke “omwo maswalale vavindele vazezwile lipandelo nakutongola lifuchi lyaAustralia mu 1788 kupwa lyakulimanyina lize nawa linahase kuyula mafuchi akwavo.”

  •  Likumbi lyaGuy Fawkes. Chiwanyino chakwanuka omu Guy Fawkes navaka-Katolika vaze vamukundwijile mangana kachi vajihe Mwangana James I navatu vamufulumende yaEngland mu 1605.”—A Dictionary of English Folklore.

  •  Likumbi Lyakutambula Chiyulo chaLifuchi. Mumafuchi amavulu, “eli lyapwa hilikumbi lize vatu veji kulinganga chiwanyino chakwanuka likumbi vatambwile chiyulo mulifuchi lyavo.”—Merriam-Webster’s Unabridged Dictionary.

•   Uno likumbi lyakunoka kana lyakundwiza vilinga vyauvumbi tahi?

   Lundongi lwamuMbimbiliya: “Lwola lwakulinga mwaya kufwila chavaka-mafuchi lunahichi lyehi, omu mwalingilenga vilinga vyakuzunguma, najipeha jajipi, nakunwa chikuma vinyo, nakulinga viwanyino vyaliuya, nakupenda, nakulemesa makombelo chakwivwisa unyengwe.”—WaPetulu 1, 4:3.

   Kweseka nalundongi kana, Vinjiho jaYehova kavazana muviwanyino muze mwaliweza kupenda naviwanyino vyaliuya. Vinjiho jaYehova veji kwivwanga kuwaha kupwa hamwe namasepa, kaha nawa vanahase kunwa wala wamweseke nge vanasake. Veji kufwilanga kukavangiza mazu akuhuhumuna amuMbimbiliya akwamba ngwawo: “Numba nge muli nakulya chipwe muli nakunwa, chipwe cheshocho muli nakulinga, lingenunga vyuma vyosena mujila yize nayimutohwesa Kalunga.”—Wavaka-Kolinde 1, 10:31.

   Shikaho, Vinjiho jaYehova kavazana muviwanyino vize vyakundwiza vilinga vize yahunga Mbimbiliya. Kuhakilako vene nachiwanyino chavaYuleya vavuluka ngwavo Purim. Mukanda waEssential Judaism wamba ngwawo: Numba tuhu chiwanyino chaPurim vanachilinginga hamyaka yayivulu mangana vanuke omu vaYuleya vayovokele mulikulukaji lyamyaka lyakusokesa 5 B.C.E., “oloze oholyapwa vanakuchivuluka ngwavo Mardi Gras chipwe Carnival,” kaha hakulinga chilika kana “veji kuvwalanga mikanjo, nakuneha vyema, nakupenda.”

 Eyo. Mbimbiliya yanangula ngwayo vatu vatela kuzanga nakuvumbika vausoko wavo chamokomoko navyuma vafwelela. (WaPetulu 1, 3:1, 2, 7) Chipwe ngocho, kachi nge Chinjiho chaYehova mwalitwamina kwazana muviwanyino vimwe, vausoko wenyi vanahase kupihilila, nakwivwa nge navasaula. Shikaho, Vinjiho jaYehova vavavulu veji kuzatanga noho hakumina ngolo javo mangana vasolole chikupu ngwavo vazanga vausoko wavo, nakuvalumbunwina mukuzangama ovyo vyavalingisa vahone kwazana muviwanyino kana. Kaha nawa veji kutambukilanga vausoko wavo kuswakumwe.

 Nduma. Vatachikiza ngwavo mutu himutu atela kulisakwila vyakulinga. (Yoshuwa 24:15) Vinjiho jaYehova ‘vavumbika vatu vosena,’ chamokomoko navyuma afwelela mutu.—WaPetulu 1, 2:17.