Vinjiho jaYehova vafwelela ngwavo jindongi najishimbi jamuMbimbiliya jinahase kuvakafwa vasakule vyakulinga vize navivanganyalisa nakwivwisa Kalunga kuwaha. (Isaya 48:17, 18) Keshi yetu twatunga eji jindongi najishimbiko, oloze tweji kufwilanga kujikavangiza kaha. Tutalenu omu jindongi najishimbi jimwe jakwata hakulisesembwa. a

•   Ulo watela kupwa wakwilila. (Mateu 19:6) Hakuwana nge Vinjiho jaYehova vamona kulisesembwa kupwa hijila yimwe yakulizangilamo kwingila muulo, ngocho vamona chuma kana kupwa chachilemu.

•   Vatu vatela kulisesembwa shina vaze kaha vanatemo kwingila muulo. Vatu kana shina vaze “[va]nahichi hatwitwi yaukweze,” chipwe vaze vanahambakana haseteko yakwivwa chikuma peha yakusaka kulisavala.—Wavaka-Kolinde 1, 7:36.

•   Vatu vaze vali nakulisesembwa vatela kupwa vakulihehwa kumbata chipwe kusomboka. Hakuwana nge jishimbi jaKalunga jahanjika ngwajo, ulo unahase kufwa kaha nge umwe nalingi ukoji, ngocho vatu vamwe vaze veji kulilukululanga kavapwa vakulihehwa kumbata chipwe kusombokako.—Mateu 19:9.

•   Vaka-Kulishitu vaze vanakusaka kwingila muulo vavalweza vambate chipwe kusombokela kaha muli Mwata. (Wavaka-Kolinde 1, 7:39) Vinjiho jaYehova vamona ngwavo, lushimbi kana lwatalisa kuli mutu uze afwelela vyuma vyovimwe navakiko nakuvikavangiza kaha nawa uze vambapachisa kupwa Chinjiho, keshi kumutu uze amona kaha vyuma vafwelela kupwa vyavilemuko. (Wavaka-Kolinde 2, 6:14) Kufuma vene kunyima, Kalunga nalwezenga vaka-kumulemesa vambate chipwe kusomboka kumutu uze afwelela vyuma vyovimwe navakiko. (Kuputuka 24:3; Malaki 2:11) Vaka-kuhehwojola vanawane ngwavo, lushimbi kana luli nakuzata namakumbi ano. b

•   Vana vatela kwononoka visemi javo. (Vishimo 1:8; Wavaka-Kolose 3:20) Vana vaze vatwama hamwe navisemi javo, vatela kwononoka vyuma navavalweza visemi javo kutalisa kukulisesembwa. Visemi vanahase kulweza vana vavo myaka vatela kupwa nayo numba vatengamo kulisesembwa, navyuma vatela kulinga kachi nge vali nakulisesembwa.

•   Chinjiho hiChinjiho eji kulisakwilanga lwola atela kuputuka kulisesembwa, namutu atela kulisesembwa nenyi kweseka najindongi jatwama muMbimbiliya. Omu mukiko lwahanjika lundongi lwakwamba ngwavo: “Mutu himutu mwalimbachila vyuma vyenyi ivene.” (Wavaka-Ngalesha 6:5) Chipwe ngocho, vavavulu vaze veji kusakulanga kuputuka kulisesembwa veji kuvangilanga kuhulisa Vinjiho vakuhya vaze vatachikiza kanawa mangana vavakafwe.—Vishimo 1:5.

•   Vyuma vize vavula kulinga vatu nge vanakulisesembwa vyapwa shili yayinene. Chakutalilaho, Mbimbiliya yatulweza tulihende kukulinga ujila. Echi kachalumbununa kulinga ujila kahako, oloze mwaliweza navilinga vikwavo vyamajilo vize kavatela kulinga vatu vaze kavalimbatako vyakufwana nge kusokota usonyi wamutu weka, chipwe kulisavala mukanwa, chipwe mujindumbi. (Wavaka-Kolinde 1, 6:9-11) Vilinga vize navilingisa mutu uze kawalimbata nenyiko evwenga peha yakusaka kulisavala, vyapwa vilinga ‘vyamajilo,’ kaha vyeji kwivwisanga Kalunga kupihya. (Wavaka-Ngalesha 5:19-21) Kaha nawa Mbimbiliya yakanyisa kuzachisa “mazu aunyengwe.”—Wavaka-Kolose 3:8.

•   Muchima wapwa uka-kutangisa. (Yelemiya 17:9) Unahase kulingisa mutu alinge vyuma vize natachikiza ngwenyi vyakuhenga. Vatu vaze vali nakulisesembwa vanahase kulihenda kukulinga vyuma vyavipi hakuhona kupwa kwaukawavo vavali kaha. Vanahase kulinga ngocho, hakupwanga kuze kuli vatu vavavulu chipwe kupwa namutu wamuchitatu. (Vishimo 28:26) Vaka-Kulishitu vavajike vaze vali nakusaka kwingila muulo vatachikiza ngwavo, chapwa chaponde kutondela mutu wakulimbata nenyi haInternet, chikumanyi kutonda mutu uze kavatachikiza kanawako.—Samu 26:4.