Vinjiho jaYehova kafwe 35,000 vatwaminenga muGermany namumafuchi aze vayulilenga kuchiyulo chaNazi, kaha Vinjiho jaYehova vakuheta kafwe ku 1,500 vavajihile mujita yize yalalishile vatu. Chipwe ngocho vatu kavatachikiza vyuma vyalingishile vavajiheko. Hakuwana nge vachili lika nakuhehwojola, ngocho mijimbu yikwavo kutalisa kuchihande kana vanahase kutulwezayo kulutwe.

•  Vavajihile ngachilihi?

•  Mwomwo ika vavayanjishilile?

•  Vafwililile kulihi?

•  Vatu vamwe vaze vajihile

•   Kuvajiha: Vinjiho jaYehova kafwe 400 vavajihile muGermany namumafuchi aze vayulilenga kuchiyulo chaNazi. Vinjiho jaYehova vavavulu vavatwalilenga kujizango jakusopela, nakuvatomena kufwa nakuvasukika. Kaha veka vavalozelenga chipwe kuvasukika chakuzeneka kuvatwala kuzango yakusopela.

•   Ukalu vamwenenga halwola vavakashilenga: Vinjiho jaYehova vakuhambakana 1,000 vafwililile muvilombo vyakulamina vafunge muNazi namutumenga. Vafwile mwomwo yakuvahana milimo yayikalu, nakuvaveta, nakuhona vyakulya, nachishika, namisongo nakuhona vitumbo. Hakuwana nge vavayanjishile chikuma, ngocho vamwe vafwile omu vavalowele mukamenga kusongo yaJita yaKaye yamuchivali.

•   Vyuma vikwavo vyavajihile: Vamwe vafwile mwomwo yakuvahaka mutupete muze mwapwile peho yayipi, kaha veka mwomwo yakuvesekelaho vitumbo kuli vandotolo.

 Vinjiho jaYehova vavayanjishilenga mwomwo vakavangijilenga muchano wamuMbimbiliya. Omu fulumende yaNazi yalwezele Vinjiho jaYehova valinge vyuma vize yakanyisa Mbimbiliya, vakiko kavetavilileko. Vasakwile “kwononoka Kalunga hakupwa ikiye muka-kuyula, kuhambakana vatu.” (Vilinga 5:29) Talenu jijila jivali valingilililemo ngocho.

1.   Kulihenda kuvihande vyalifuchi nachiyulo. Nganomu chapwa kuVinjiho jaYehova vosena makumbi ano, naVinjiho vaze vapwile muchiyulo chaNazi valihendelenga kuvihande vyalifuchi nachiyulo. (Yowano 18:36) Ngocho vakanyine

   •   Kuzata mulimo wauswalale chipwe kwazana mujita.​—Isaya 2:4; Mateu 26:52.

   •   Kuvwota chipwe kukundwiza fulumende yaNazi.​—Yowano 17:16.

   •   Kulinga chilutu chipwe kuhanjika ngwavo “Mwalisenu Hitler!”​—Mateu 23:10; Wavaka-Kolinde 1, 10:14.

2.   Kulinga vyuma vize vafwelela. Numba tuhu Vinjiho jaYehova vavakanyishile kulinga vyuma vafwelela, oloze vakiko vatwalileho lika

   •   Kulombela hamwe nakulemesa Kalunga.​—WavaHepeleu 10:24, 25.

   •   Kwambulula mujimbu wamuMbimbiliya nakuhana vatu mikanda yahanjika haMbimbiliya.​—Mateu 28:19, 20.

   •   Kusolwela likoji vakwavo, kuhakilako vene navaYuleya.​—Mako 12:31.

   •   Kulinjilila kuvyuma vafwelela nakukana kusayina lipapilo lyakukana lufwelelo lwavo.​—Mako 12:30.

 Mutu atanga chikuma Robert Gerwarth ambile ngwenyi, Vinjiho jaYehova “likiko kaha liuka lize vayanjishilenga chikuma muchiyulo chaThird Reich mwomwo yavyuma vafwelela.” a Vakwavo vafunge vaze muvapwililile muchilombo vasangejekele Vinjiho jaYehova mwomwo yalufwelelo lwavo lwakukola. Funge umwe uze afumine kuAustria ambile ngwenyi: “Kavaya kujitako. Vanahase kulisuula kuvajiha, muchishishisa chakujiha vatu.”

•   Muvilombo vyakulamina vafunge: Vinjiho jaYehova vavavulu vafwililile muvilombo vyakulamina vafunge. Vavakashililile muvilombo vyakufwana nge Auschwitz, namuBuchenwald, namuDachau, namuFlossenbürg, namuMauthausen, namuNeuengamme, namuNiederhagen, namuRavensbrück namuSachsenhausen. Muchilombo chaSachsenhausen kaha mwafwililile Vinjiho jaYehova kafwe 200.

•   Tumenga: Vinjiho jaYehova vamwe vavavetelelenga nakuvajiha mutumenga. Kaha veka vafwile mwomwo yakuvalemeka halwola vavehwojwelenga.

•   Kuvihela vavajihilililenga: Vinjiho jaYehova vavajihilililenga chikuma mukamenga kamuBerlin-Plötzensee, namuBrandenburg namuHalle/Saale. Kaha nawa kuli vihela vikwavo 70 kuze vajihilililenga Vinjiho jaYehova.

•  Lijina: Helene Gotthold

   Chihela vamujihililile: Plötzensee (Berlin)

   Helene apwile pwevo wakusomboka uze apwile navana vavali, kaha vamukashilenga mapapa kakavulu. Mumwaka wa 1937 wamuyanjishilenga chikuma omu vapwile nakumusopesa, kaha nalijimo apwile nalyo lyafumine. Kuheta ha 8 December, 1944 vamusukikile mukamenga kamuPlötzensee muBerlin.

•  Lijina: Gerhard Liebold

   Chihela vamujihililile: Brandenburg

   Gerhard vamujihile ha 6 May, 1943 halwola apwile namyaka 20, omu mwahichile kaha myaka yivali kafuma haze vajihile ise mukamenga vene kaze. Asonekele mukanda wakusalisa tanga yenyi napwevo uze asakile kumbata. Asonekele ngwenyi: “Chakuzeneka kungukafwa kuli Mwata, kachi kangwahashile kumika nakuheta kusongoko.”

•  Lijina: Rudolf Auschner

   Chihela vamujihililile: Halle/Saale

   Rudolf vamujihile ha 22 September, 1944 omu apwile namyaka 17. Mumukanda uze asonekelele naye ambile ngwenyi: “Vandumbwetu vavavulu vanomikanga hakuhita muukalu kana, ngocho nayami nangumika.”