Vinjiho jaYehova vanazachisanga jiMbimbiliya jakulisezaseza hakulinangula. Oloze vazanga kuzachisa chikuma Mbimbiliya yaVisoneka vyaKaye Kakahya, yize yili mumalimi akulisezaseza mwomwo yatwama nalijina lyaKalunga, yakwoloka, kaha nawa yayashi kwivwishisa.

•   Yatwama nalijina lyaKalunga. Vaka-kusoneka Mbimbiliya vamwe kavavumbika MwenyaMbimbiliyako. Chakutalilaho muMbimbiliya yimwe vasonekamo majina avatu akuzomboka 70 vaze vasonekele Mbimbiliya kana. Oloze muMbimbiliya kana vafumisamo lijina lyaMwenyaMbimbiliya Yehova Kalunga.

   MuMbimbiliya yaKaye Kakahya lijina lyaKalunga valihaka hosena haze lyapwile muvisoneka vyakulivanga, oloze kavavuluka majina avatu vamukomiti vaze vatwaminyinyine mulimo wakwalumunako.

•   Yapwa yakwoloka. JiMbimbiliya jimwe kajahanjika vyuma vyakwolokako. Chakutalilaho, muMbimbiliya yimwe chisoneka chaMateu 7:13 vachalumuna ngwavo: “Ingililenu kuchikolo chachindende, mwomwo chikolo chakuya muhelo chachinene najila yakuyamo yayashi kuyiwana.” Oloze muvisoneka vyakulivanga vazachisa lizu “kukunonga” keshi “heloko.” Chasoloka nge vaka-kwalumuna vazachishile lizu “helo,” mwomwo vafwelela ngwavo vaka-kuhuka vosena navakavayekelesa mukakahya kahelo haya myaka yosena. Chaluvinda, Mbimbiliya kayakundwiza vishinganyeka kanako. Kaha Mbimbiliya yaKaye Kakahya yalumuna mwakwoloka chisoneka kana ngwayo: “Ingililenu kuchikolo chachindende, mwomwo chikolo chachinene najila yakuhweka vili nakutwala kukunonga.”

•   Yayashi kwivwishisa. Mbimbiliya yatela kupwa yakwoloka kaha nawa yayashi kwivwishisa. Tutalenu hachakutalilaho chino. Hali Wavaka-Loma 12:11, kaposetolo Paulu azachishile hanjikiso valumuna lizu hilizu yize yalumbununa “shipilitu yakusava.” Hakuwana nge hanjikiso kana, muLuvale kayeshi kuhana ulumbunwiso uveneko, ngocho muMbimbiliya yaKaye Kakahya yalumuna hanjikiso kana mujila yayashi kwivwishisa. Hanjikiso kana yahanjika kutalisa kuli vaka-Kulishitu ngwavo “savenu nashipilitu.”

 Numba tuhu muMbimbiliya yaKaye Kakahya mwatwama lijina lyaKalunga, kaha nawa yakwoloka, yayashi kwivwishisa, oloze kuli chuma cheka chakulipwila chize chalingisa yilihandunune najiMbimbiliya jeka. Chuma kana shina, Mbimbiliya kana vali nakuyihana kuvatu hawana wakanyombo. Echi chinalingisa vatu vavavulu vatange Mbimbiliya mulilimi lyavo kuhakilaho navatu vaze kaveshi kuhasa kulanda Mbimbiliyako.