Lwola lwosena, vyuma twafwelela vyapendamina haMbimbiliya, ngocho tunalumunangako vyuma vimwe twafwelela mwomwo yakwivwishisa ulumbunwiso wauhya wamuVisoneka. a

 Kwalumuka kana chalitombola nalundongi lwamuMbimbiliya vavuluka hali Vishimo 4:18 lwakwamba ngwavo: “Jila yavaka-kwoloka yinapu nge musana wakututuka chalikumbi uze weji kuyanga nakumunyika lika palanga nomu naliheta likumbi hamulungu.” Ngana muze kututuka chamusana cheji kumunyikanga chindende chindende, mukiko nawa Kalunga ali nakukafwa vatu jenyi vevwishishise muchano halwola lwakutamo. (WaPetulu 1, 1:10-12) Ngana muze Mbimbiliya yahanjikila chimweza, Kalunga ali nakutwalaho lika kukafwa vatu jenyi vevwishise chikuma muchano ‘mumakumbi ano akukuminyina.’—Ndanyele 12:4.

 Kwalumuka chinakupwako kutalisa kujila tweji kwivwishishilangamo muchano wamuVisoneka, kachatela kutulingisa tulikomokeleko. Vaka-kulemesa Kalunga vakushikulu navakiko vapwilenga navishinganyeka vyakuhenga kutalisa kuvyuma vatalililenga, ngocho vatelele kwalumunako vishinganyeka kana.

•   Hamyaka 40, Mose alisuwile kupwa muka-kuyovola muyachi waIsalele kweseka nalwola luze atongwele Kalunga.—Vilinga 7:23-25, 30, 35.

•   Vaposetolo vahonene kwivwishisa upolofweto uze wahanjikile vyakufwa chaMeshiya nakusanguka chenyi.—Isaya 53:8-12; Mateu 16:21-23.

•   Vaka-Kulishitu vakulivanga vamwe vapwile navishinganyeka vyakuhenga kutalisa kulwola nalikeza “likumbi lyaYehova.”—Wavaka-Tesolonyika 2, 2:1, 2.

 Oloze kutwala muze, Kalunga olwele vishinganyeka vyavo. Kaha tunafwelela ngwetu Kalunga mwatwalaho kulinga mwomumwe nakuli etu.—WaYakova 1:5.