Makuli: Chuma cheji kulingisanga Vinjiho vakane kwazana muchilika chaKulisimasi, shina mwomwo yakuhona kufwelela Yesu.

 Muchano: Twapwa tuvaka-Kulishitu. Kaha twafwelela ngwetu ulwilo weza mwomwo yaYesu Kulishitu.—Vilinga 4:12.

 Makuli: Mweji kulingisanga jitanga jihone kulinunga hakuvakanyisa kwazana muchilika chaKulisimasi.

 Muchano: Twazakama jitanga, ngocho tweji kuzachisanga Mbimbiliya hakukafwa jitanga jizame.

 Makuli: Kamwalingila vakwenu vyuma vyamwaza veji kulinganga vatu halikumbi lyaKulisimasi vyakufwana nge kulihana mawana, nakuneha kuunda hamavu, nakukisula vakwenu.

 Muchano: Tweji kuhananga vakwetu mawana nakuneha kuunda hakumbi hakumbi. (Vishimo 11:25; Wavaka-Loma 12:18) Chakutalilaho, jila tweji kukungulukilangamo najila tweji kwambulwilangamo yasolola hatoma nge, tweji kukavangizanga mazu ahanjikile Yesu ngwenyi: “Mwatambwile chawana, hanenunga nawa chawana.” (Mateu 10:8) Kaha nawa tweji kukafwanga vatu vatachikize ngwavo Wangana waKalunga ukiko kaha naukalingisa hano hamavu hakapwe kuunda chamwenemwene.—Mateu 10:7.

•   Yesu ahanyine lushimbi ngwenyi, twatela kwanukanga kufwa chenyi keshi kusemuka chenyiko.—Luka 22:19, 20.

•   Vaposetolo jaYesu natumbaji vakulivanga kavazanyinenga muchilika chaKulisimasiko. Mukanda waThe New Catholic Encyclopedia wamba ngwavo: “Chilika chaKulisimasi chaputukile kafwe mumwaka wa 243 [C.E.],” Halwola kana himunahichi lyehi myaka yakuhambakana 100, kufuma haze afwililile kaposetolo wamakumishilo.

•   Kakwatwama unjiho wakusolola nge Yesu asemukile ha December 25 ko. Likumbi asemukile kavalisoneka muMbimbiliyako.

•   Twafwelela ngwetu Kulisimasi kavayitavila kuli Kalungako mwomwo yafuma muvilika vyamukwitava chamakuli.—Wavaka-Kolinde 2, 6:17.

 Chaluvinda vatu vavavulu veji kulinganga chilika chaKulisimasi numba tuhu vatachikiza ngwavo, chilika kana chafuma mukwitava chamakuli kaha nawa Mbimbiliya kayakundwiza chilika kanako. Ngocho vatu kana vanahase kulihulisa ngwavo: Mwomwo ika vaka-Kulishitu navahonena kwazana muchilika chaKulisimasi? Kaha mwomwo ika navakaluhwishila michima yavo kutalisa kuchilika kana?

 Mbimbiliya yatulweza tuzachisenga ‘uhashi wetu wakushinganyeka.’ (Wavaka-Loma 12:1, 2) Kaha nawa yatunangula tumonenga muchano wamuMbimbiliya kupwa waulemu. (Yowano 4:23, 24) Tunahase kushinganyeka hajila vatu veji kutumwenangamo, oloze etu twafwila kukavangiza jindongi jamuMbimbiliya, numba nge vatu navatumona kupwa tuvakusalila.

 Numba tuhu tweji kukananga kwazana muchilika chaKulisimasi, oloze tweji kuvumbikanga lisesa lyavakwetu lyakulisakwila vavene vyakulinga kutalisa kuchihande kana. Katwakanyisa vakwetu kwazana muchilika kanako.