Vinjiho jaYehova veji kukavangizanga vyuma yahanjika Mbimbiliya, vize vyeji kuvakafwanga vahonenga kukumbulula kuvyuma vyosena navavavangijikila chipwe kuvatoleka. Chakutalilaho Mbimbiliya yahanjika ngwayo: “Ou mwolola muka-kutoleka mwasaka vamusaule.” (Vishimo 9:7, 8; 26:4) Tweji kuhakanga muchima kukulinga vyuma vize navivwisa Kalunga kuwaha, muchishishisa chakulipula jipami nakukumbulula kukala vyuma navatuvangijikila.—Samu 119:69.

 Tachikizenu ngwenu kwatwama “lwola lwakuhola kulu, nalwola lwakuhanjika.” (Muka-kwambulula 3:7) Ngocho, tweji kukumbululanga vatu vaze navasaka kutachikiza muchano, nakuliula vaze vasaka kulipula kaha jipami. Shikaho tweji kukavangizanga vyuma anangwile Yesu nachakutalilaho chenyi nachavaka-Kulishitu vakulivanga.

•   Yesu kakumbulwile vatu vaze vamuvangijikilile omu vamutwalile kuli Pilatuko. (Mateu 27:11-14; WaPetulu 1, 2:21-23) Kaha nawa Yesu kakumbulwile vatu vaze vamuvangijikilile ngwavo afwa hakulya nahakunwako. Oloze asakile vilinga vyenyi vimusolole omu apwa, ngana muze tweji kutanganga ngwavo: “Mangana eji kulijimbulanga kupwa akwoloka kumilimo yawo.” (Mateu 11:19) Kaha lwola lumwe akumbulwilenga vaze vamulingilenga mwamupi.—Mateu 15:1-3; Mako 3:22-30.

   Yesu alwezele vaka-kumukavangiza vahonenga kuhomba kachi nge vatu vali nakuvavangijikila. Ambile ngwenyi: “Mwawahilila enu navasaula kuvatu nakumiyanjisa nakumivangijikila vyuma vyavipi vyeka navyeka vyosena mwomwo yayami.” (Mateu 5:11, 12) Ambile nawa ngwenyi kachi nge vaka-kumukavangiza navasakiwa kuhana unjiho mwomwo yakuvavangijikila kuli vaka-kole javo, kaha mwatesamo lushiko lwenyi lwakwamba ngwavo: “Nangukamihana mazu namangana aze navakahona vaka-kumimanyina nakole vosena kulingulula chipwe kuhamikako.”—Luka 21:12-15.

•   Kaposetolo Paulu ahuhumwine vaka-Kulishitu valihende kukulipula jipami jauleya navaka-kole javo, mwomwo jipami kana japwile ‘jamokomoko kaha nawa jaufwefwelekete.’—WaChituse 3:9; Wavaka-Loma 16:17, 18.

•   Kaposetolo Petulu akolezezele vaka-Kulishitu vahakwile lufwelelo lwavo kachi nge chinahase. (WaPetulu 1, 3:15) Ngocho amwene ngwenyi chapwile chamwaza kuhakwila lufwelelo lwavo kuhichila muvilinga keshi hakanwa kahako. Asonekele ngwenyi: “Hakulinga mwamwaza, [munahase] kuholesa vaze vahona mangana vaze navahanjika vyuma vyauleya.”—WaPetulu 1, 2:12-15.