Etu Vinjiho jaYehova twazanga kushimutwila navatu vamumauka osena vyuma twafwelela, oloze katwalemesela hamwe Kalunga navatu vaze vafwelela vyuma vize katwafwelelako. Mbimbiliya yamba ngwayo, vaka-Kulishitu vamuchano vapwa ‘vakulinunga.’ Kaha chuma chavalingisa valinunge, shina mwomwo yakufwelela vyuma vyovimwe. (Wavaka-Efwesu 4:16; Wavaka-Kolinde 1, 1:10; Wavaka-Fwilipi 2:2) Echi kachalumbununa kaha kupwa navilinga vyakufwana nge zangi, nakutetela nakulikonekelako, oloze mwaliweza navyuma vyeka. Vyuma twafwelela vyazama hachinyingi chakwoloka chamuMbimbiliya.—Wavaka-Loma 10:2, 3.

 Mbimbiliya yafwanyisa kulemesela hamwe Kalunga namauka eka, kukulikasa toka navatu vaze kavetavako. Kaha chuma kana chinahase kutulingisa tuseze tufwelelo lwetu. (Wavaka-Kolinde 2, 6:14-17) Ngocho Yesu ketavishile tumbaji twenyi valemesele hamwe Kalunga navatu vamukwitava chekako. (Mateu 12:30; Yowano 14:6) Kaha nawa muJishimbi jize Kalunga ahanyine Mose, Kalunga akanyishile vaIsalele vahone kulemesela hamwe navatu vaze valihachile navo. (Kulovoka 34:11-14) VaIsalele vakushishika vakanyinenga kuvakafwa kuvatu vaze kachi vavalingishile valweze mukulemesa chamakuli.—Ezela 4:1-3.

 Eyo. Mu 2023 twazachile jiola jakuheta ku 1,791,490,713 hakushimutwila navatu vamukwitava cheka. Ngana mwakaposetolo Paulu, nayetu twasaka kutachikiza vyuma vafwelela “vatu vavavulu” nge tuli nakuzata mulimo wakwambulula. (Wavaka-Kolinde 1, 9:19-22) Shikaho hakushimutwila navatu, tweji kufwilanga kukavangiza lundongi lwamuMbimbiliya luze lwatulweza tupwenga “nakalemesa chikuma” kuvatu vosena.—WaPetulu 1, 3:15.