Vatu vaze vapwile Vinjiho jaYehova vakumbapachisa oloze valitwamina kwambulula mujimbu pamo mwomwo yakuzeya, katweshi kulitwamina kulikata navoko. Lwola lumwe tweji kuyanga nakuvakolezeza nakuvakafwa mangana vazame cheka kushipilitu.

 Katweshi kufumisa mutu muchikungulwilo chikalu kaha nge navulumuna mulonga washili wauneneko, nduma. Oloze nge Chinjiho wakumbapachisa mwapwa natato yakuhokola jishimbi jamuMbimbiliya nakuhona kupihilila nakwalumuka, kaha tweji kumufumisa muchikungulwilo nakuhona kulikata nenyi. Mbimbiliya yahanjika hatoma ngwayo: “Mufumisenu uze muka-kuhuka muli enu.”—Wavaka-Kolinde 1, 5:13.

 Nyi ngachilihi nge lunga vanamufumisa muchikungulwilo, oloze puwenyi navana venyi hanga vachili lika Vinjiho jaYehova? Keshi kulikata nachikungulwiloko, oloze eji kutwalaho lika kulinunga natanga yenyi. Ulo wavo weji kutwalililaho lika nakulizanga lika natanga yenyi.

 Mutu vafumisa muchikungulwilo nahase kutwalaho lika kwiza kukukunguluka chetu. Kaha nawa lwola lumwe vakulwane muchikungulwilo vanahase kumukafwa kushipilitu. Veji kulinga vyuma kanevi mangana vakafwe vaze vatu vatengamo cheka kupwa Vinjiho jaYehova. Vatu vahanga muchikungulwilo vaze veji kumbilanga vilinga vyavo vyavipi nakufwila kukavangiza jishimbi jamuMbimbiliya veji kuvatambulanga cheka muchikungulwilo.