Tweji kukavangizanga vyuma yahanjika Mbimbiliya kutalisa kuulo nakukulilukulula. Kalunga ajinyine ngwenyi valunga napwevo vatwamenga lika muulo. Visonekavyamba ngwavyo vatu vatela kulilukulula mwomwo yaujila.—Mateu 19:5, 6, 9.

 Eyo, kuzachisa jijila jakulisezaseza:

•   Mikanda. Eyi mikanda yeji kwizanga lwola lwosena, yinahase kukafwa vaze vali naukalu muulo, kuhakilako namalo aze ali muukalu wakulinga nahameso wi. Chakutalilaho, talenu chihande chakwamba ngwavo, “Kushishika” nachakwamba ngwavo “Kukonekela.”

•   Kukunguluka. Tweji kulinangula hajindongi jamuMbimbiliya jize jahanjika haulo, kukunguluka chachikungulwilo, nachachihanda nachangalila.

•   Vakulwane. Vakulwane muchikungulwilo veji kukafwanga vaze valimbata kuzachisa chisoneka chaWavaka-Efwesu 5:22-25 navisoneka vyeka.

 Nduma. Kachi nge vakulwane vali nakukafwa valunga napwevo vaze vali naukalu muulo, kaha kavatela kulweza vatu kana vyakulingako. (Wavaka-Ngalesha 6:5) Chipwe ngocho, nge mutu mwasaka kulukulula chakuzeneka mulonga vetavisa muVisoneka, kaha mutu kana katela kumbata chipwe kusombokako.—WaChimoteu 1, 3:1, 5, 12.

 Mbimbiliya yakolezeza vaka-kulimbata vatwamenga lika hamwe muulo nge kakweshi mulonga waunene wakulihandunwinako. (Wavaka-Kolinde 1, 7:10-16) Ukalu wauvulu unahase kukuma kuhichila mukulomba, nakukavangiza jindongi jamuMbimbiliya, nakulizanga nawa.—Wavaka-Kolinde 1, 13:4-8; Wavaka-Ngalesha 5:22.

 Chipwe ngocho, vaka-Kulishitu vamwe vanasakulanga kulihandununa navaka-mahyavo kachi nge vali nakuhita muukalu waunene wakufwana nge:

•   Kuvasuvilila kuli muka-mahyavo.—WaChimoteu 1, 5:8.

•   Kuvaveta kuli muka-mahyavo.—Samu 11:5.

•   Kuvakanyisa kuli vaka-mahyavo kulinga vyuma vyakushipilitu. Chakutalilaho, mutu nahase kulingisa muka-mahyenyi ahokole jishimbi jaKalunga mujijila jimwe. Halwola kana, uze vali nakuyanjisa nahase kusakula ivene nge kulihandununa mwaya jishimbi chikiko kaha nachimukafwa atwaleho lika “kwononoka Kalunga hakupwa ikiye muka-kuyula, kuhambakana vatu.”—Vilinga 5:29.