Tweji kukavangizanga munona munona jindongi jamuMbimbiliya jize jahanjika hachilika chaKulya chaMwata chaChingoloshi, chize vavuluka nawa ngwavo ‘Kulya chaMwata,’ Kulya chaMwata Chamakumishilo, kaha nawa ngwavo Chilika chaKwanuka Kufwa chaYesu. (Wavaka-Kolinde 1, 11:20; Luvale Bible 1970) Oloze vyuma vafwelela mumauka amwe akwitava navyuma veji kulinganga hachilika kanechi kavyafuma muMbimbiliyako.

 Chilika chaKulya chaMwata chaChingoloshi chapwa chakwanuka Yesu, nakumusakwilila hakulisuula kwiza nakutufwila. (Mateu 20:28; Wavaka-Kolinde 1, 11:24) Echi chilika kachapwa chakuwavisa vatu, chipwe kulomba Kalunga atetele vatu chipwe kuvakonekela jishiliko. Mbimbiliya yanangula ngwayo vanahase kutukonekela jishili jetu nge natufwelela muli Yesu, keshi nge hakulinga chilika chimwe chamukwitavako.—Wavaka-Loma 3:25; WaYowano 1, 2:1, 2.

 Yesu alwezele tumbaji twenyi valingenga chilika chaKulya chaMwata chaChingoloshi, oloze kavalwezele mapapa kangahi vatela kulinga ngochoko. (Luka 22:19) Vamwe vashinganyeka ngwavo chilika kana vatela kuchilinga kakweji hikakweji, veka veji kuchilinganga chalumingo hichalumingo, veka hakumbi hakumbi, veka mapapa kakavulu halikumbi, veka nawa ngwavo mutu atela kulinga chilika kana kala heshoho nazangila ivene. a Oloze achitalenu vishina vino twatela kuhunananaho.

 Yesu alingile chilika chaKulya chaMwata chaChingoloshi halikumbi lize vaYuleya valingilenga chilika chaPaseka, kaha afwile halikumbi vene lize. (Mateu 26:1, 2) Kwapwile chuma chimwe chamulingishile asakule likumbi kana. Visoneka vyafwanyisa wana waYesu kuli mwanamukoko uze vajihilenga haPaseka. (Wavaka-Kolinde 1, 5:7, 8) Chilika chaPaseka vachilingilenga kamwe mumwaka. (Kulovoka 12:1-6; VyavaLevi 23:5) Chochimwe nawa, vaka-Kulishitu vakulivanga valingilenga chilika chaKwanuka Kufwa chaYesu kamwe mumwaka. b Ngocho naVinjiho jaYehova veji kukavangizanga echi chakutalilaho chamuMbimbiliya.

 Jila yize Yesu alingililemo echi chilika yatukafwa tutachikize mapapa twatela kuchilinga, nalikumbi nalwola twatela kuchilinga. Yesu alingile echi chilika hakulauka chalikumbi haNyisane 14, 33 C.E., kweseka nakalenda yamuMbimbiliya. (Mateu 26:18-20, 26) Ngocho nayetu tweji kulinganga echi chilika chaKwanuka Kufwa chaMwata halikumbi lyolimwe mwaka himwaka, ngana muze valingilenga vaka-Kulishitu vakulivanga. c

 Numba tuhu likumbi lyaNyisane 14 mu 33 C.E. lyapwile lyaChitanu, oloze likumbi kana linahase kupwa hakala likumbi lyamuchalumingo mwaka himwaka. Tweji kutachikizanga likumbi lyaNyisane 14 mwaka himwaka hakulava ngana muze valavilenga vatu mumakumbi aYesu. Katwakavangiza jila veji kulavilangamo vaYuleya vamakumbi anoko. d

 Omu Yesu aputukile echi chilika, azachishile mbolo navinyo vize vyasalileho hachilika chaPaseka. (Mateu 26:26-28) Ngocho nayetu tweji kukavangizanga chakutalilaho chenyi hakuzachisa mbolo yakuzeneka chimbalwila navyeka vyakuhakako, navinyo vichila vyanganavene, keshi nge musoji wamihako yamivinyo chipwe vinyo vyakuhaka shuka navyuma vyekako.

 Mujichachi jimwe veji kuzachisanga mbolo yachimbalwila chipwe vyuma vyeka vyakuyemesa nakufutunwisa, oloze muMbimbiliya chimbalwila vachifwanyisa kushili navilinga vyavipi. (Luka 12:1; Wavaka-Kolinde 1, 5:6-8; Wavaka-Ngalesha 5:7-9) Ngocho mbolo yakuhona kuhaka chimbalwila navyuma vyeka, yikiko kaha yinahase kwimanyinako mujimba waKulishitu wakuzeneka shili. (WaPetulu 1, 2:22) Vyuma vikwavo veji kulinganga mujichachi jimwe vize kavyatwama muMbimbiliya, shina vyakuzachisa musoji wamihako yamivinyo muchishishisa chakuzachisa vinyo vivene. Veji kulinganga ngocho mwomwo yalushimbi valikashila vavene lwakukanyisa kunwa wala luze kalwatwama muMbimbiliyako.—WaChimoteu 1, 5:23.

 Mbolo yakuzeneka chimbalwila navinyo vichila vize veji kuzachisanga hachilika chaKwanuka Kufwa chaMwata, vyapwa vifwanyisa vize vyemanyinako mujimba namanyinga aKulishitu. Eyi mbolo navinyo kavavyalumuna mujila yakukomwesa nakupwa nyama namanyinga avene, nganomu vashinganyeka vatu vamweko. Achitalenu Visoneka vino vyatulingisa tufwelele ngocho.

•   Nge Yesu alwezele tumbaji twenyi vanwenga manyinga enyi, kahanyi apwile nakuvalweza vahokole lushimbi lwaKalunga luze lwakanyisa kulya manyinga. (Kuputuka 9:4; Vilinga 15:28, 29) Echi kacheshi kuhasa kupwa ngochoko, mwomwo Yesu keshi kuhasa kulweza vatu vahokole lushimbi lwaKalunga luze lwamba nge manyinga apwa ajilako.—Yowano 8:28, 29.

•   Kachi nge vaposetolo vapwile nakunwa manyinga aYesu avene, kachi Yesu kahanjikile ngwenyi manyinga enyi “nawamwangala[ko].” Yesu ahanjikile mazu kana shimbu kanda alihane ivene kupwa chimuna wakuvatula.—Mateu 26:28.

•   Yesu alihanyine ivene kupwa chimuna wakuvatula “kamwe kaha kunahu.” (WavaHepeleu 9:25, 26) Oloze nge mbolo navinyo vyapwile chikupu nyama namanyinga enyi hachilika chaKulya chaMwata chaChingoloshi, kahechi chili nakulumbununa nge vaze veji kulyanga mbolo nakunwa vinyo hachilika kana veji kuhananga cheka chimuna wakuvatula.

•   Yesu ambile ngwenyi: “Lingenunga lika ngocho mungwanukilengaho ami,” keshi nge “munguhanenga mwachimuna wakuvatulako.”—Wavaka-Kolinde 1, 11:24.

 Mauka amwe akwitava afwelela ngwavo mbolo navinyo azachishile Yesu hachilika vyapwile mujimba wenyi uvene namanyinga enyi avene. Vafwelela vyuma kana mwomwo yajivesi jimwe jamuMbimbiliya. Chakutalilaho, jiMbimbiliya jajivulu jasolola nge Yesu ahanjikile havinyo ngwenyi: “Evi vinapu manyinga ami.” (Mateu 26:28) Oloze mazu ahanjikile Yesu havinyo vanahase kuwalumuna nawa ngwavo: “Evi vinakulumbununa manyinga ami,” “Evi vinemanyinako manyinga ami,” chipwe “Evi vinapu chinjikizo chakusolola manyinga ami.” e Kakavulu Yesu anangwilenga vatu kuzachisa vifwanyisa. Shikaho nahavesi kaneyi, Yesu azachishile chifwanyisa.—Mateu 13:34, 35.

 Omu Vinjiho jaYehova veji kulinganga chilika chaKulya chaMwata chaChingoloshi, vatu vavandende kaha vakiko veji kulyanga mbolo nakunwa vinyo. Mwomwo ika?

 Manyinga aYesu aze amwangalile alingishile kupwenga “lushiko lwaluhya,” luze lwashishile lushiko luze Yehova Kalunga alishikile namuyachi wavaIsalele kushikulu. (WavaHepeleu 8:10-13) Vosena vaze vatwama mulushiko kana vakiko veji kulyanga mbolo nakunwa vinyo hachilika chaKwanuka Kufwa chaMwata. Mulushiko kana kamwatwama vaka-Kulishitu vosenako, oloze mwatwama kaha vaka-Kulishitu vaze “vasanyika” kuli Kalunga mujila yakulipwila. (WavaHepeleu 9:15; Luka 22:20) Vatu kana navakayula hamwe naKulishitu mwilu, kaha Mbimbiliya yanangula ngwayo kuvula chavatu kana chapwa 144,000.—Luka 22:28-30; Kusoloka 5:9, 10; 14:1, 3.

 Ava vatu navakayula hamwe naKulishitu mwilu vavavuluka nawa ngwavo “utanga wamikoko waundende.” Etu vavavulu twapwa ‘muliyongomena lyalinene’ lyavatu vaze navakayoyela hano hamavu haya myaka yosena. (Luka 12:32; Kusoloka 7:9, 10) Numba tuhu etu tukwechi lutalililo lyakukayoyela hano hamavu katweshi kulya mbolo nakunwa vinyo hachilika chaKwanuka Kufwa chaMwatako, oloze tweji kupwanga kuchilika kana mangana tusolole ngwetu twasakwilila Yesu hakwiza nakutufwila.—WaYowano 1, 2:2.