Lizavu lyaKutwaminyina lyapwa lizavu lyalindende lyavaka-Kulishitu vakuhya kushipilitu vaze veji kuhananga jindongi Vinjiho jaYehova mukaye kosena. Veji kulinganga ngocho mujijila jino jivali:

•   Veji kutwaminyinanga mulimo wakuhana jindongi jamuMbimbiliya kuhichila mumikanda najivindiyo, namukukunguluka, namumashikola aVinjiho jaYehova.—Luka 12:42.

•   Veji kutwaminyinanga mulimo wakwambulula uze veji kuzatanga Vinjiho jaYehova mukaye kosena nakutala mwakuzachishila mawana amuliuka.

 Lizavu lyaKutwaminyina lyeji kulondezezanga chakutalilaho ‘chavaposetolo navakulwane muYelusalema’ vamulikulukaji lyamyaka lyakulivanga, vaze vahanyinenga jindongi vaka-Kulishitu vosena. (Vilinga 15:2) Vaposetolo navakulwane keshi vakiko vapwile vatwamina jaliukako, kaha omu mukiko chapwa nakuLizavu lyaKutwaminyina makumbi ano. Veji kupendaminanga haMbimbiliya mwomwo vatachikiza ngwavo Yehova Kalunga atongola Yesu Kulishitu kupwa Mutwe wachikungulwilo.—Wavaka-Kolinde 1, 11:3; Wavaka-Efwesu 5:23.

 Malunga vatwama mulizavu lyakutwaminyina shina Kenneth Cook, Jr., naGage Fleegle, naSamuel Herd, naGeoffrey Jackson, naStephen Lett, naGerrit Lösch, naMark Sanderson, naDavid Splane, naJeffrey Winder. Ava malunga veji kuzachilanga hachikota chetu muWarwick, New York, U.S.A.

 Lizavu lyaKutwaminyina lyatunga jikomiti 6 mangana jitwaminyine milimo yakulisezaseza, kaha mutu himutu wamuLizavu lyaKutwaminyina atwama mukomiti yimwe chipwe kuhambakanaho.

•   Komiti yaKuwanyisa: Komiti kana yeji kutalanga havihande vyakujizango jakusopela, nahajiponde, nahavihande vyakuyanjisa Vinjiho jaYehova mwomwo yavyuma vafwelela, nahaukalu weka uli nakusakiwa kutalaho washi uze vali nakumona Vinjiho jaYehova.

•   Komiti Yatala haJitanga jaMbetele: Komiti kana yatala hajitanga javaka-Mbetele.

•   Komiti Yatala haKupulita naKutuma Mikanda: Komiti kana yeji kutalanga hamulimo wakupulita, nakutunga, nakutuma mikanda yahanjika haMbimbiliya nakutunga vihela vyakulemesela Kalunga, najiofesi jakwalumwina mikanda nakutunga jizuvo jahaMbetele.

•   Komiti yaMulimo: Komiti kana yeji kutwaminyinanga mulimo wakwambulula, “mujimbu wamwaza waWangana.”—Mateu 24:14.

•   Komiti Yakunangula: Komiti kana yeji kutalanga hamulimo wakuwahisa vihande tweji kuzachisanga hakukunguluka, nakumashikola, namujipolongalamu jamazu akukopa najivindiyo.

•   Komiti Yakusoneka Mikanda: Komiti kana yatala hamulimo wakuwahisa kulya chakushipilitu chakupulita nachahaInternet nakutwaminyina mulimo wakwalumuna.

 Lizavu lyaKutwaminyina kalyazata kaha milimo yamujikomitiko, oloze lyeji kuliwananga nawa chalumingo hichalumingo nakushimutwila havyuma vili nakusakiwa muliuka. Kukuliwana kana, veji kushimutwilanga vyuma vyahanjika Visoneka, nakwitavila shipilitu yajila yaKalunga yivatwaminyine vasakule kanawa vyakulinga.—Vilinga 15:25.

 Kwatwama vaka-Kulishitu vakuhya kushipilitu vaze veji kukafwanga jikomiti jamuLizavu lyaKutwaminyina. (Wavaka-Kolinde 1, 4:2) Vapwa vasachitetahundu mumilimo yamujikomiti muze vavahaka, kaha nawa veji kupwanga kukuliwana chamujikomiti kana chalumingo hichalumingo. Numba tuhu kavatwama nalisesa lyakusakula vyuma vyakulingako, oloze veji kuhanjikanga vyuma vize navikafwa Lizavu lyaKutwaminyina lisakule vyakulinga, nakukavangiza nawa vyuma linakase nakukekesa omwo vyuma kana vili nakukafwa liuka. Vanahase nawa kuvahana mulimo wakuya nakutambukila vandumbwetu kumafuchi amwe, chipwe kuhanjika vihande hakuliwana chamwaka himwaka chipwe hachilika chavaze vanakumisa shikola yaNgileyate nahavilika vyeka.