Vinjiho jaYehova vavumbika jifulumende navifwanyisa vyalifuchi. Twejiva ngwetu vatu vamwe vanahase kusakula kumona lifuchi lyavo kupwa lyalilemu, chipwe kulifukula kulipandelo chipwe kwimba mwaso walifuchi.

 Oloze Vinjiho jaYehova kavalinga vyuma kanako mwomwo vatachikiza ngwavo vyuma kana vyalimbalaka navyuma yanangula Mbimbiliya. Twasaka vatu vavumbike vyuma twafwelela ngana muze tweji kuvumbikanga vyuma vafwelela.

Vili muchihande chino

•  Jindongi muka jamuMbimbiliya veji kukavangizanga?

•  Ngachilihi nge fulumende yinahakeko lushimbi lwakwazana muvilika vimwe?

•  Uno Vinjiho jaYehova veji kwazananga muvihande vyalifuchi nachiyulo tahi?

 Vyuma tweji kusakulanga vyapendamina hajindongi jamuMbimbiliya jino jivali:

•   Kalunga kaha ikiye tweji kulemesanga. Mbimbiliya ngwayo: “Lemesanga Yehova Kalunga kove, ikiye kaha watela kuzachilanga mulimo wajila.” (Luka 4:8) Mazu atwama mumwaso walifuchi eji kusololanga nge mutu uze ali nakuwimba azanga chikuma lifuchi lyenyi kuhambakana kala chuma. Shikaho, Vinjiho jaYehova kavemba mwaso kanako.

   Vinjiho jaYehova vamona ngwavo kulifukula kulipandelo chapwa hikulemesa tulunga chipwe makombelo, vyuma vize Mbimbiliya yakanyisa. (Wavaka-Kolinde 1, 10:14) Vatu vamwe valinangula vyakushikulu vamba ngwavo mapandelo apwa vinjikizo vyamukwitava. Carlton J. . Hayes ambile ngwenyi: “Zangi yakuzanga lifuchi yapwa nge kwitava, kaha chinjikizo chalifuchi chapwa lipandelo.” a Daniel P. Mannix ahanjikile hali vaka-Kulishitu vakulivanga ngwenyi: “Vaka-Kulishitu vakanyinenga kulifukula kuli mwangana wavaLoma. Namakumbi ano vaka-Kulishitu kavalifukula kulipandeloko.” b

  Numba tuhu Vinjiho jaYehova kavalifukula kulipandeloko chipwe kukala vinjikizo vyalifuchiko, oloze kaveshi kuvipula, chipwe kuvyocha, chipwe kuhona kuvimona kupwa vyavilemu mukala jilako.

•   Vatu vosena vapwa vavalemu kuli Kalunga. (Vilinga 10:34, 35) Mbimbiliya yamba ngwayo “kumutu umwe [Kalunga] aloweleko miyachi yavatu yosena.” (Vilinga 17:26) Echi chikiko chalingisa Vinjiho jaYehova vamone ngwavo nachipwa chakuhenga kumona muyachi umwe chipwe lifuchi limwe kupwa vyavilemu kuhambakana vikwavo. Shikaho, tweji kuvumbikanga vatu vosena chamokomoko nokwo vatwama chipwe okwo vafuma.—WaPetulu 1, 2:17.

 Vinjiho jaYehova kavapwa vaka-kulikanga kufulumendeko. Twafwelela ngwetu jifulumende jatwama havyuma vize “alongesa Kalunga” mangana vipwengako. (Wavaka-Loma 13:1-7) Kaha nawa twafwelela ngwetu vaka-Kulishitu vatela kwononoka vaka-fulumende.—Luka 20:25.

 Ngachilihi nge jishimbi jafulumende jinalimbalaka najishimbi jaKalunga? Lwola lumwe chinahase kupwa chakutamo kulomba fulumende yalumuneko jishimbi yinakase. c Oloze nge fulumende nayikana kwalumunako jishimbi yinakase, Vinjiho jaYehova veji kusakulanga “kwononoka Kalunga hakupwa ikiye muka-kuyula, kuhambakana vatu.”—Vilinga 5:29.

 Nduma. Vinjiho jaYehova kavazana muvihande vyalifuchi nachiyuloko. Omu tweji kulihendanga kukumona lifuchi lyetu kupwa lyalilemu chikuma, nakukana kulifukula kulipandelo nakukana kwimba mwaso walifuchi, katwasolola nge twasaka kuneha vikokojola mangana twalumune vyuma mulifuchiko. Oloze tweji kukavangizanga vyuma vyamuMbimbiliya twafwelela kutalisa kuvilika kana.