Nduma. Liuka lyetu kalyakekesa jivindiyo jimwe chipwe mikanda yimwe chipwe myaso yimwe mangana vatunge lushimbi lwakukanyisa vatu vyuma kanako. Mwomwo ika?

Mbimbiliya yakolezeza mutu himutu anangule “uhashi [wenyi] wakukekesa vyuma” mangana amone vyuma vyamwaza nevi vyavipi.—WavaHepeleu 5:14.

Muvisoneka mwatwama jindongi jize jinahase kukafwa muka-Kulishitu asakule kanawa vyakuhemahema. a Chuma twatela kufwila kulinga mukuyoya chetu shina ‘kutwalaho lika kukekesanga tumone vyuma vize etavila Mwata.’—Wavaka-Efwesu 5:10.

Mbimbiliya yanangula ngwayo mitwe yajitanga vatwama nawata, shikaho vanahase kwitavisa chipwe kukanyisa vaka-tanga yavo vyakuhemahema vimwe. (Wavaka-Kolinde 1, 11:3; Wavaka-Efwesu 6:1-4) Oloze kakweshi mutu atwama nangolo jakulweza mutu uze keshi kukanda yenyiko vyuma atela kutala chipwe kwivwililako.—Wavaka-Ngalesha 6:5.