Vatu vaze tweji kulavanga kupwa Vinjiho jaYehova shina vaze veji kwazananga mumulimo wakwambulula mujimbu wamwaza kakweji hikakweji. (Mateu 24:14) Vatu kana shina vaze vambapachisa kupwa Vinjiho navaze kanda vambapachise oloze vanatemo kuzata mulimo wakwambulula.

 Nduma. Kuhana mawana keshi chikiko kulingisanga mutu vamulave ngwavo Chinjiho chipwe kumuhana milimo muliukako. (Vilinga 8:18-20) Kaha nawa mawana amavulu vatu veji kuwahananga mukusweka. Chinjiho hiChinjiho eji kuzachisanga lwola lwenyi nangolo jenyi navikumba vyenyi mangana akundwize mulimo wamukaye kosena kweseka nomwo najinyi mumuchima, nomwo nawa mwahashila.—Wavaka-Kolinde 2, 9:7.

 Kakweji hikakweji, Vinjiho veji kuhananga lipoti lyamilimo vanazate kuchikungulwilo chavo. Lipoti kana kalyapwa lyakushinjilako.

 Malipoti achikungulwilo veji kuwafutulanga nakuwatuma kuofesi yamutango. Kaha mutango weji kufutulanga malipoti avikungulwilo vyosena vyamulifuhi lyavo chipwe mungalila yamutango wavo nakuvituma kuchikota.

 Kukukuma chamwaka wamulimo, a veji kulavanga kuvula chaVinjiho mulifuchi hilifuchi. Kaha jitotala josena veji kujifutulanga nakuwana jino kuvula chaVinjiho jaYehova mukaye kosena. Jitotala jamafuchi osena veji kujihakanga hakeyala yetu yahaInternet hachihanda chakwamba ngwavo “Around the World.” Malipoti kana eji kutujikijisanga ngana muze ajikijishile vaka-Kulishitu vakulivanga.—Vilinga 2:41; 4:4; 15:3.

 Numba tuhu katwavalavila hali Vinjiho jaYehovako, oloze tweji kuvatambulanga muvikungulwilo vyetu. Vavavulu veji kupwanga kuchilika chaKwanuka Kufwa chaKulishitu, shikaho kuvula chavo tweji kuchitachikijilanga kafwe hachihandwa chavaze veji kupwanga kuchilika kana, hakuvesekesa kukuvula chaVinjiho jaYehova. Chakutalilaho, vatu vapwile kuchilika chakwanuka kufwa chaKulishitu mu 2023, vahetele ku 20,461,767.

 Vatu vavavulu vaze katwakunguluka navoko, veji kunganyalanga kupolongalamu yakulinangula Mbimbiliya hawana wakanyombo hamembo avo. Chakutalilaho, mu 2023, kakweji hikakweji twatetekelelenga vilongesa vyaMbimbiliya vyakuheta ku 7,281,212, kaha vamwe vavanangwililenga halwola lwolumwe.

 Mumafuchi amwe, vaka-fulumende veji kuhulisanga kaha mutu kuliuka apandama. Chakutalilaho, vaka-fulumende ya U.S. vaze vatala vyakulava vatu vambile ngwavo kulava chavo “chapwa kaha chakufwila kuwana liuka lize mwavuluka mutu ivene ngwenyi kukiko apandama,” kaha nawa ngwavo jitotala veji kuwananga “kajapwa jitotala jiveneko, oloze jakwesekesako kaha.” Oloze etu, vatu tweji kulavanga ngwetu Vinjiho jaYehova shina vaze kaha veji kwambulilanga vatu nakuhana lipoti lyamilimo vanazate, keshi nge vaze navalivuluka kaha ngwavo Vinjihoko.