Hali Mateu 28:19, 20 Yesu avulukileho vyuma vize vinahase kutukafwa tupwenga tuVinjiho jaYehova. Mazu atwamaho asolola nge mutu uze mwasaka kupwa kambaji kaKulishitu, atela kwambululanga mujimbu wamwaza hali Yehova.

 Chuma chatete: Kulinangula Mbimbiliya. Yesu alwezele vaka-kumukavangiza ‘vanangulenga vatu vapwenga tumbaji.’ (Mateu 28:19, 20) Lizu valumuna ngwavo “kambaji” lyalumbununa “muka-kulinangula.” Vyuma vize anangwile Yesu Kulishitu vyasolola vyuma vinahase kukafwa mutu apwenga wakuwahilila mukuyoya chenyi. (WaChimoteu 2, 3:16, 17) Natuwahilila chikuma kumikafwa mulinangule Mbimbiliya hawana wakanyombo.—Mateu 10:7, 8; Wavaka-Tesolonyika 1, 2:13.

 Chuma chamuchivali: Kuzachisa vyuma namulinangula. Yesu ambile nawa ngwenyi vatu vaze veji kulinangulanga vatela ‘kulamanga vyuma vyosena vize anangwile.’ (Mateu 28:20) Echi chili nakulumbununa nge kamwatela kaha kulinangula Mbimbiliya mangana mupwenga nachinyingi chachivuluko, oloze mwatela kwalumunako vilinga vyenu. (Vilinga 10:42; Wavaka-Efwesu 4:22-29; WavaHepeleu 10:24, 25) Vatu vaze veji kulamanga vyuma vyosena vize ahanjikile Yesu, veji kulisuulanga kumukavangiza nakulihana kuli Yehova Kalunga.—Mateu 16:24.

 Chuma chamuchitatu: Lumbapachiso. (Mateu 28:19) MuMbimbiliya, lumbapachiso valufwanyisa kukufunda. (Esekesenuko Wavaka-Loma 6:2-4.) Kulumbununa nge mutu nafu kuchiyoyelo chenyi chamwaka nakupwa jino nachiyoyelo chachihya. Kumimbapachisa cheji kusololanga hatoma nge munalingi vyuma vivali ahanjikile Yesu nakulomba Kalunga amikafwe mupwenga nachivezu chitoma.—WavaHepeleu 9:14; WaPetulu 1, 3:21.

 Lwezenu vakulwane vamuchikungulwilo chenu. Kaha navamikafwa mutachikize vyuma vyasakiwa numba mutengamo kumimbapachisa, nakumikafwa muzachise vyuma munalinangula, nakumikafwa nawa mulihane kuli Yehova namuchima wenu wosena.—Vilinga 20:28; WaPetulu 1, 5:1-3.

 Eyo. Tweji kulelanga vana vetu “mukuvazangamisa namukuhuhumuna chakuli Yehova” ngana muze yatulweza Mbimbiliya. (Wavaka-Efwesu 6:4) Omu vana vali nakuya nakukola vatela kulisakwila vavene vyakulinga mukuyoya nakulinangula, nakwitavila vyuma navalinangula nakukavangiza vyuma yanangula Mbimbiliya shimbu kanda vatengamo kuvambapachisa. (Wavaka-Loma 12:2) Shikaho mutu himutu, atela kulisakwila ivene kulemesa Kalunga chipwe chiku.—Wavaka-Loma 14:12; Wavaka-Ngalesha 6:5.