Mu 2011 lunga umwe afumine kuEritrea nakuya nakutwama kuNorway. Omu Vinjiho jaYehova vamuNorway vayile nakumwambulila avalwezele ngwenyi vamwambulilaho lyehi kuli Vinjiho jaYehova omu apwile kulifuchi lyenyi. Ambile nawa ngwenyi, omu apwile nakuzata mulimo wauswalale muEritrea, amwene Vinjiho jaYehova navavakasa mutumenga hakukana kwingila uswalale mwomwo yalufwelelo lwavo, numba tuhu vapwile nakuvayanjisa chikuma.

 Kutwala muze, ou lunga alingile vyuma vimwe, ngocho naikiye vamukashile mukamenga. Muze mukamenga awanyinemo Vinjiho vatatu Paulos Eyasu, naNegede Teklemariam, naIsaac Mogos vaze vanakase mwomwo yalufwelelo lwavo kufuma vene mu 1994.

 Omu ou lunga apwile mukamenga amwene chikupu ngwenyi, Vinjiho jaYehova veji kukavangizanga vyuma veji kunangulanga. Amwene ngwenyi vapwa vakushishika, kaha nawa vahanyinenga vakwavo vafunge vyakulya vapwilenga navyo. Amwene nawa omu vafunge vaze vapwile Vinjiho valikungulwilenga hamwe hakumbi hakumbi nakulinangula Mbimbiliya, nakusanyikako vakwavo valinangwile hamwe. Omu vavalwezele ngwavo navavafumisa mukamenga kachi nge navasayina lipapilo mangana vakane lufwelelo lwavo, vakiko vakanyine.

 Chuma kana chakunywile ou lunga, kaha omu ayile nakutwama kuNorway afwililile jino kutachikiza ovyo vyalingisa Vinjiho jaYehova vapwenga nalufwelelo lwakukola. Kahomu Vinjiho jaYehova vayile nakumwambulila, hahaze vene aputukile kulinangula Mbimbiliya nakuyanga kukukunguluka.

 Kuheta muSeptember 2018, ou lunga vamumbapachishile nakupwa Chinjiho chaYehova. Oholyapwa eji kutuminanga vatu vakulifuchi lyaEritrea naSudan vaze vahanjika lilimi lyolimwe naikiye nakuvakolezeza valinangule Mbimbiliya mangana vapwenga nalufwelelo lwakukola.