Zarina vamumbapachishile nakupwa Chinjiho chaYehova omu apwile mulifuchi lyaRussia. Kufumaho, akindulukile kulifuchi lyenyi lyakuCentral Asia. Kaha afwililile kunangula vana venyi vamapwevo vavali muchano. Hakuwana nge kapwile najimbongoko, ngocho atwaminenga hamwe navisemi jenyi, nasongo yenyi walunga napuwenyi muzuvo yakapete kamwe. Visemi jenyi vamukanyishilenga kunangula vana venyi muchano wamuMbimbiliya. Kaha nawa vakanyishile vazukulu javo kuhanjikanga vyamuMbimbiliya nanevo.

 Zarina ashinganyekele havyuma atela kulinga mangana anangulenga vana venyi hali Yehova. (Vishimo 1:8) Ngocho, amulombele chikuma amutwaminyine nakumuhana mangana. Aputukile kuyanga navana venyi nakwolola mahinji nakushimutwilanga navo havyuma atenga Kalunga. Echi chavakafwile vazange kulinangula hali Tengi.

 Kutwala muze awanyine jila yakuvanangwilamo kuzachisa mukanda wakwamba ngwavo Uno Chikupu Mbimbiliya Yanangula Vyuma Muka? a Asonekelenga jipalangalafu jacho navihula hatumapapilo. Kaha nawa ahakililengako namazu akuvakafwa kwivwishisa chihande. Kufumaho, aselemekelenga aze mapapilo nasonekeso kwishi yalikina lyakukosela uvwalo. Omu vana venyi vayilenga mukapete kakukosela, vatangilenga aze mapapilo nakukumbulula vize vihula.

 Jila kana yakafwile Zarina anangule vana venyi tupetulu vavali mumukanda waMbimbiliya Yanangula numba jino vawane zuvo yavo yakutwamamo. Hakuwana nge apwile jino nakuliyoyela, chapwile chachashi kunangula vana venyi muchano chakuzeneka mutu wakumukanyisa. Kuheta muOctober 2016, vana venyi vosena vavali vavambapachishile. Kukilikita chanevo hakupwa wakuvanguluka nakuzachisa mangana chavakafwile valyenganga kulya chakushipilitu.