Lwola lumwe Artur uze apwile kalama wakujinguluka apwile nakutambukila chikungulwilo chaVinjiho jaYehova chamuArmenia. Kuheta kuze awanyine nge, vandumbwenyi vakungalila kana kanda lyehi vambulwilengaho kuvihela vyasanga kuzachisa tumatemba twakushindumuna. Artur napuwenyi Anna, nandumbwavo weka Jirayr vaputukile kuzachisa kalitemba kakushindumuna mumbaka yimwe yayindende mangana vakolezeze vandumbwavo. Kalitemba kana vakatumbikilenga kuchihela kuze kwahichilenga vatu vavavulu.

 Nakushimbula chiku, vatu vaze vahichilenga vaputukile kukunyuka nakumbata mikanda. Kutwala muze, eyi jila yayihya yakwambulwilamo yevwishile kupihya vatu vaze vahungilenga Vinjiho jaYehova. Kaha likumbi limwe vapilishitu vavali vejile kuze kukalitemba, kaha umwe alyachile kaze kalitemba nakukashinjika nalihinji. Kufumaho avetele Artur mbanda kumeso, kaha vivanjilo vyenyi vyahameso vyaholokele. Artur, napuwenyi Anna, naJirayr vesekele kuunjisa vaze vapilishitu, oloze vahonene. Shikaho vaze vapilishitu vaputukile kulyatangila kaze kalitemba, kaha mikanda yosena yalisanjile. Hanyima yakuhanjika vyuma vyavipi hali Vinjiho nakuvevwisa woma, vaze vapilishitu vayile.

 Artur, napuwenyi Anna, naJirayr, vayile nakwambulula chihande kana kutupokola. Ngocho valumbunwine vyuma vyasolokele, kaha vashimutwilile nawa vyuma vyamuMbimbiliya natupokola vamwe navatu veka. Kufumaho ava Vinjiho vatatu, vavatwalile kuofesi yamukulwane watupokola. Hakavanga ou mukulwane watupokola asakile kaha kutachikiza vyuma vyasolokele. Oloze omu atachikijile ngwenyi Artur uze apwile lunga wakutakama, kazungile navaze vapilishitu omu vamuvetele mbandako, uze mukulwane watupokola alitwaminyine kuhulisa vihula vyakutalisa kuchihande, nakuputuka jino kuhulisa vamulweze vyuma vafwelela Vinjiho. Echi chavalingishile vashimutwilile nenyi hajiola jiwana. Uze mukulwane watupokola alikomokelele chikuma hakwivwa vyuma vamulwezele, ngocho ambile ngwenyi: “Liuka kana lyamuchano. Nayami ngunakusaka kupwa nguChinjiho chaYehova.”

 Kahomu Artur aputukile cheka kwambulwila kuchihela chasanga, lunga umwe uze amwene vyuma vyasolokele ejile kuli ikiye. Uze lunga asangejekele Artur hakupwa wakuunda nakuhona kuzunga navaze vapilishitu. Amulwezele ngwenyi, vyuma amwene vyamulingishile alitwamine jino kuvumbika vaze vapilishitu.

 Likumbi vene lize nachingoloshi, uze mukulwane watupokola asanyikile Artur ezenga kuofesi yenyi. Oloze muchishishisa chakushimutwila hachihande, amuhulishile vihula vyavivulu vyakupandama kuMbimbiliya. Echi chalingishile tupokola veka vavali navakiko vezenga nakwivwilila kuvyuma vapwile nakushimutwila.

 Kaha lichako Artur ayile cheka kuofesi yauze mukulwane watupokola mangana akamutalise jivindiyo jetu jimwe jahanjika haMbimbiliya. Kuheta kuze, uze mukulwane watupokola asanyikileko tupokola veka mangana navakiko vatale jivindiyo kana.

 Shikaho kupihya chavilinga vyavaze vapilishitu, chalingishile tupokola vavavulu vevwenga mujimbu halwola lwatete. Chuma kana chavalingishile vavumbike Vinjiho jaYehova.