Vavwalilenga Katachikijilo kaUngonyi

PUTUKA KWIMBISA

Ndumbwetu Maud uze atwama muFrance eji kuzatanga mulimo wakukafwa vaka-shikola vavitonji halwola lwakutanga. Kaha likumbi limwe vaka-kashikola vapwile nakulinangula chihande chaKulalisa vatu nechi chakuhaka vatu muvilombo vyaNazi vyakulamina vafunge. Vafunge vapwilenga natutachikijilo twaulombo wakulisezaseza tuze vatongelelele hauvwalo wavo wamukamenga. Ulombo wakatachikijilo najila vakatungilililemo vyasolwele ovyo funge vamukashililile.

Kaha mulongeshi ahanjikile kutalisa kuli vafunge vaze vavwalile tutachikijilo twaungonyi ngwenyi: “Vavakashile mwomwo pamo vavawanyine namulonga wakulisavala navatu vausonyi woumwe.” Omu vakotokele, Maud alwezele mulongeshi ngwenyi, vaka-Nazi vahakilenga Vinjiho jaYehova tutachikijilo twaungonyi mangana vavejivileho. a Kaha amushikile ngwenyi, mwakamulweza vyavivulu hachihande kana lwola lukwavo. Ngocho mulongeshi etavilile nakulweza Maud akalweze vaka-shikola chihande kana.

Kaha omu vaka-shikola veka vapwile nakulinangula hachihande chochimwe, mulongeshi weka avalwekesele chati yapwile nakusolola tutachikijilo vavwalilenga vafunge. Chati kana yasolwele nge tutachikijilo twaungonyi vatuvwalilenga kaha kuli Vinjiho jaYehova. Omu vakotokele, Maud alwezele mulongeshi mijimbu yimwe yakutalisa kuchihande kana. Mulongeshi evwile kuwaha kaha amulwezele akalweze vaka-shikola chihande kana.

Maud nakwate mikanda azachishile

Maud awahishile chihande chakuhanjika muminyutu 15, oloze omu lwola lwakuchihanjika lwahetele mulongeshi amulwezele ngwenyi: “Tunakwitavisa uhanjike haola yamuundu.” Maud avangililile kutalisa vaka-shikola vindiyo yapwile nakusolola omu vaka-Nazi vayanjishile Vinjiho jaYehova. Omu vindiyo yahanjikile ngwayo vaka-Nazi vambachile vana vaVinjiho 800, Maud emikile vindiyo nakuvatangila mijimbu yitatu yavana vaVinjiho vamwe. Omu akumishile kuvatalisa vindiyo, avatangilile mukanda wakusalisa uze asonekele Gerhard Steinacher mwana Chinjiho walunga wamyaka 19 wamuAustria. Asonekelele visemi jenyi ou mukanda mu 1940 omu kwasalile jiola jajindende nakumujiha kuli vaka-Nazi. b

Maud alwezele navaka-shikola vakwavo mujimbu kana. Tunakumusakwilila chikuma ndumbu Maud hakumika chenyi, mwomwo chalingisa vaze valongeshi vahanjikenga jino hali Vinjiho jaYehova nge vali nakunangula vaka-shikola vyavatu vapwile muvilombo vyaNazi.

a Omu kwapwile Jita yaKaye yamuchivali, Vinjiho jaYehova muGermany vaze vavulukilenga ngwavo Vaka-Kulinangula Mbimbiliya (Bibelforscher) vavakashile mutumenga mwomwo vakanyine kukundwiza chiyulo chaNazi.

b Gerhard Steinacher vamutomenene kumujiha mwomwo akanyine mulimo wauswale muGermany. Mumukanda wenyi wakusalisa, asonekelemo ngwenyi: “Ami ngumwana wamundende. Nge Mwata mwanguhana ngolo kaha nangujikiza. Evi vikiko nguli nakufwila.” Lichako nachimene Gerhard vamutetele mutwe. Kaha hachimbumbe chenyi vasonekeleho ngwavo: “Nafwila hakwononoka Kalunga.”