Chinjiho chaYehova umwe mulifuchi lyaSouth Africa walijina lyaDanielle, awanyine ngonga yamutu muchitanda chavo chakulanjishila vyakulya. Mungonga kana mwapwile chikwama chize chapwile najimbongo, najikati jakukongwelaho vyuma. Danielle asakile kutachikiza mwenya yize ngonga mangana amukindulwishileyo. Ngocho asanjile mungonga kana mangana awane nambala yashinga chipwe keyala yamwenyayo, oloze awanyinemo kaha lijina lyamutu walunga. Atuminyinyine vaka-nyambaulu vayauze lunga, oloze shinga kayaheteleko. Kufumaho atumine shinga kuzachisa nambala yapwile halisiti lyakufuma kuli ndotolo lize awanyine muze mungonga, kaha uze akumbulwile shinga etavilile kuhana nambala yashinga yaDanielle kuli mwenyangonga.

 Uze lunga mwenyangonga alikomokelele hakutambula shinga kufuma kuchipatela yakumulweza ngwavo Danielle nawane ngonga yenyi, shikaho ali nakusaka kumukindulwishilayo. Jino omu ayile nakutambula ngonga yenyi, Danielle naise vatambwokesele uze lunga nachisambo. Danielle naise valwezele uze lunga vyuma vyavalingishile vafwile kukindulwisa ngonga yenyi. Vamulwezele ngwavo vapwa Vinjiho jaYehova, shikaho veji kukavangizanga jindongi jamuMbimbiliya. Ngocho vasaka kupwa vakushishika lwola lwosena.—WavaHepeleu 13:18.

 Omu ayile uze lunga, atumine mazu akusakwilila Danielle naise hakumukindulwishila ngonga nachikwama chenyi. Asonekele ngwenyi: “Ngunamisakwilila chikuma hakungutondatonda mangana munguwane nakungukindulwishila ngonga yami. Ngwevwanga kuwaha kushimutwila nenu, ngocho nangwanukanga lika muchima wenu wamwaza. Shikaho ngunakusaka kumihana wana uze nausolola kusakwilila chami. Kaha nawa ngunatachikiza ngwami mweji kulisuulanga kuzachila Kalunga. Chikupu vene, kushishika chaDanielle chinasolola nge mwapwa muvatu vavilinga vyamwaza. Shikaho ngunamisakwililako chikuma, kaha Kalunga atwaleho lika kumikisula omu namutwalaho kumuzachila.”

 Omu mwahichile tukweji, ise yaDanielle aliwanyine cheka nauze lunga, kaha amulwezele ngwenyi awanyine chikwama ajimbalishile mutu umwe muchitanda muze apwile nakulanda vyuma. Omu awanyine mwenyacho amukindulwishililecho nakumulweza vyuma vyamulingishile alinge ngocho. Amulwezele ngwenyi namukindulwishilacho mwomwo naikiye vamukindulwishilile vyuma ajimbalishile. Kaha ambile ngwenyi: “Kupwa namuchima wakushishika muvyuma vyavindende namuchima wakutetela, cheji kulingisanga vatu natusolwela muchima kana vatulondezeze. Kaha echi cheji kulingisanga vatu vosena mungalila vapwenga vakuwahilila.”