Marta uze apwa Chinjiho chaYehova wamulifuchi lyaGuatemala, apwile nakulinangula lilimi lyaKekchi mangana ambulule mujimbu wamwaza kuli vatu vazachisa lilimi kana. Likumbi limwe amwene lunga umwe ali nakufuma hachipatela. Omu Marta amumwene, ashinganyekele ngwenyi nafumu kuKekchi kungalila yajipili kuze Vinjiho jaYehova kavambulwila chikumako. Ngocho ayile kuli uze lunga nakuputuka kumuhanjikisa mulilimi lyaKekchi.

 Marta ahulishile uze lunga numba nge mwetavila kulinangula Mbimbiliya. Uze lunga etavilile kulinangula, oloze ahanjikile ngwenyi kapwile najimbongo jakufwetako. Marta amulumbunwinyine ngwenyi, Vinjiho jaYehova veji kulinangulanga Mbimbiliya navatu hawana wakanyombo. Amulwezele nawa ngwenyi, vanahase kulinangulanga kuzachisa shinga, kaha natanga yenyi yinahase kupwako. Uze lunga etavilile. Hakuwana nge uze lunga atachikijile kuhanjika nakutanga lilimi lyaSpanish, ngocho Marta amuhanyine Mbimbiliya yaVisoneka vyaKaye Kakahya yamulilimi lyaSpanish. Amuhanyine nawa mukanda wakuzachisa hakulinangula waUno Chikupu Mbimbiliya Yanangula Vyuma Muka? wamulilimi lyaKekchi. Kaha chalumingo chakavangijileho, Marta aputukile kulinangula nauze lunga, napuwenyi navana vavo vavali kuzachisa shinga. Valinangwilenga kavali muchalumingo. Marta ambile ngwenyi: “Hakuwana nge kangwatachikijile kanawa lilimi lyaKekchiko, ngocho twalinangwilenga mulilimi lyaSpanish mwomwo uze lunga navana vavo vatachikijile lilimi kana. Kaha pwevo vapwile nakumulumbunwina mulilimi lyaKekchi.”

 Lunga kana apwile pashita muchachi. Ngocho apwile nakulwezako vakwavo vaka-chachi vyuma apwile nakulinangula Mbimbiliya. Vaze vaka-chachi vazangile vyuma vevwile, kaha vamuhulishile avalweze okwo awanyine echi kunangula chachihya. Kahomu avalwezele ngwenyi apwile nakulinangula Mbimbiliya naVinjiho jaYehova, navakiko vaputukile kupwanga kuchilongesa kana. Nakushimbula chiku, chalumingo hichalumingo vatu kafwe 15 vapwilenga nakwiza mangana valinangule naMarta kuzachisa shinga. Kutwala muze, vahakilenga mayikolofwoni kushinga mangana vosena vevwengako.

 Omu Marta alwezele tulama vamuchikungulwilo chenyi vyechi chilongesa chaMbimbiliya, kalama umwe ayile kungalila apwile nakutwama uze chilongesa. Ou kalama avasanyikile kuya nakwivwilila chihande apwile nakuhanjika kalama wakujinguluka a kuchikungulwilo chapwilile kwakusuku kutambuka ola yimwe naminyau, kaha jiola jitatu namahinji. Vilongesa vyaMbimbiliya 17 vayile nakwivwilila kuchihande kana.

 Omu mwahichile vyalumingo, kalama wakujinguluka naVinjiho veka, vakindulukile kungalila kana, kaha vatwamineko makumbi awana. Chimene hichimene vatalilenga jivindiyo jize jahanjika haMbimbiliya mulilimi lyaKekchi nakulinangula mbuloshuwa yakwamba ngwavo Veya Vali Nakulinga Mwaya Muchima waYehova Makumbi Ano? Kaha chingoloshi hichingoloshi vatalilenga vihanda vimwe vyaJW Broadcasting. Kalama wakujinguluka awahishile vyuma mangana chilongesa hichilongesa apwenga namutu wakumunangula Mbimbiliya.

 Hamakumbi aze awana, Vinjiho vambulwilile nakujingalila jakwakamwihi jamuKekchi nakulanya vatu vezenga kukunguluka chakulipwila. Omu valikungulwile, vandumbwetu valwezele vatu 47 vaze vakungulukile mangana vaputuke kulinangula Mbimbiliya. Ngocho jitanga 11 jetavilile kulinangula.

 Kahomu mwahichile tukweji vavandende, tulama vawahishile vyuma mangana vayenganga lwola lwosena nakukungulukila kungalila kana kusongo yachalumingo. Oholyapwa kafwe vatu 40 veji kukungulukanga lwola lwosena. Vandumbwetu vawahililile chikuma omu vatu 91 vakungalila kana vejile kuKwanuka Kufwa chaYesu.

 Marta ambile ngwenyi: “Omu ngweji kwanukanga omu chaputukile echi chilongesa nomwo vatu vavulilileko, cheji kungulingisanga ngusakwilile Yehova. Shimbu jimwe ngweji kulivwa nge nevi ngweji kuzatanga vyauchi, oloze twapwa tuvinoma mulivoko lyaYehova. Kalunga amwene vyuma vyapwile mumichima yavatu vakungalila kana, ngocho avakafwile vapandame kuliuka lyenyi. Chikupu vene, Yehova avazanga chikuma.”