Kachi nge mwapwa muVinjiho jaYehova, kaha achishinganyekenu omu munahase kwivwa nge navamishinjikiza kutupokola omu muli nakwambulula mujimbu wamwaza kuzuvo hizuvo. Omu mukiko chapwile kuli Joseph muMicronesia mu 2017. Joseph naVinjiho veka vatatu vapwile nakuzata kapeni yakulipwila mangana vambulile vatu vahamatungu akwakusuku.

 Kuheta nachingoloshi vaze Vinjiho vawana vahetele halitungu haze hatwama vatu kafwe 600. Kahomu vahetele hachisekeseke vaze Vinjiho vavatambwokesele kuli mukulwane wambongi wahalitungu kana. Joseph alumbunwine vyuma vyasolokele ngwenyi: “Mukulwane wambongi ambile ngwenyi, minyau yatupokola nayitutwala kujizuvo javatu josena. Twalikomokelele hakwivwa mazu kana, oloze twakanyine mukalemesa. Twasakile kuya kuzuvo hizuvo nakwambulila vatu mujila yize tweji kwambulilangamo.”

 Ngocho ava vaka-kwambulula vaputukile jino kutambuka nakufwila kwambulila vatu vavavulu. Vaze Vinjiho vambile ngwavo: “Vatu vamungalila kana vapwile nachisambo, kaha vakwile kanawa kumujimbu twavambulilile. Shikaho echi chatulingishile tushimbule chikuma hazuvo hizuvo.”

 Likumbi vene lize, minyau yatupokola yahichile kuze apwile nakwambulwila Joseph navakwavo mapapa kavali, kaha kamuchitatu yemanyine. Kufumaho tupokola valwezele Joseph ngwavo, natumitwala kujizuvo jize jinasaleko. Joseph akanyine. “Oloze halwola kanelu tupokola vatushinjilile nakwamba ngwavo, ‘Kalinwomu kutoke, shikaho tuli nakusaka kumitwala kujizuvo josena jize jinasaleko.’ Ngocho twetavilile, kaha vatutwalile kujizuvo josena jize jasalileko. Omu twahetelenga hazuvo hizuvo, tupokola vatulwezelenga lijina lyatanga nakutulweza nawa ngwavo omu namungongomweza nge nou mwakumbulula wauchi, kaha navavumisa chivumo chakuminyau yavo.

 “Chuma kana chatukafwile tutambukile jizuvo josena halikumbi kana. Twahanyine mikanda yayivulu nakutunga maungeji akukindulukilako kuvatu vaze vapwile vakuwahilila.”

 Vaze tupokola valwezele Joseph ngwavo, “navakiko valivwishile kuwaha kwazana mumulimo wakwambulula mujimbu wamwaza.” Kahomu vaze Vinjiho vakumishile nakuputuka kukinduluka, vaze tupokola vavasalishile nakumwesa kukanwa oku vanakwate mikanda yahanjika haMbimbiliya kumavoko.