Likumbi limwe, Chinjiho chaYehova umwe wapwevo walijina lyaEliso, apwile muzuvo yapwevo umwe nakumunangula Mbimbiliya. Jino kukasumuka kuzuvo yayou pwevo kwejile vangeji. Kwejile twamina wamukwitava napuwenyi. Eliso evwile mujimbu wakuvuluka nge ava valunga napwevo vafwishile mwanavo umwe kaha walunga vapwile nenyi.

 Omu Eliso alwezele ou twamina wamukwitava napuwenyi ngwenyi chinapihi chikuma kufwisa, ava valunga napwevo vaputukile kulila chikuma. Jino ou twamina wamukwitava ahanjikile oku napihilila ngwenyi: “Kangwatachikijile ovyo Kalunga netavishila ukalu kana utusolokeleko. Mwomwo ika mwambachila mwanami umwe kaha walunga ngwapwanga nenyi? Ngunazachila Kalunga hamyaka 28, kaha ngunalinginga vyuma vyamwaza, oloze jino talenu vyuma nangufwete hakumuzachila. Mwomwo ika Kalunga najihila mwanami?”

 Eliso alumbunwinyine ava valunga napwevo ngwenyi Kalunga keshi ikiye ajihile mwanavoko. Kaha nawa ashimutwilile navo chihande chandando yakusokola, nakusanguka, novyo Kalunga eji kwitavishilanga vyuma vyavipi visoloke. Echi chalingishile uze twamina wamukwitava napuwenyi valweze Eliso ngwavo nakumbulula vihula vapwile nakulomba Kalunga avakumbulule.

 Chalumingo chakavangijileho, uze twamina napuwenyi vayile cheka kuzuvo yauze pwevo mangana navakiko vakavanangule Mbimbiliya. Kuheta kuze vawanyine Eliso ali nakunangula ou pwevo chihande chakwamba ngwavo “Lutalililo Watela Kupwa Nalwo haVatu Wazanga Vaze Vafwa,” chize chatwama mumukanda waUno Chikupu Mbimbiliya Yanangula Vyuma Muka? Ava valunga napwevo valivwishile kuwaha kushimutwila chihande kanechi.

 Kutwala muze, ava valunga napwevo vayile kukukunguluka changalila chakulipwila chaVinjiho jaYehova munganda yaTbilisi, mulifuchi lyaGeorgia, kaha valikomokelele hakumona zangi nakulinunga chaVinjiho jaYehova, mwomwo evi vikiko vilinga vanangwilenga vatu vamuchachi yavo, oloze vahonenenga kusolola vilinga kana.