Vatu vakumiyachi nakumalimi akulisezaseza vatwama mumusenge waAmazon muSouth America kuze kupwa kwakusuku chikuma nambaka. Kaha kuheta muJuly 2017, Vinjiho jaYehova vakuheta ku 13, vatambukilile jingalila jakungenge yakalwiji Maroni najingalila jakumututuko waFrench Guiana. Vayile nakulinga ika? Vayile nakwambulula mujimbu wamwaza wamuMbimbiliya.

 Omu kwasalile kakweji umwe nakuputuka ou ungeji wamakumbi 12, vosena vaze vapwile nakuya valiwanyine mangana valikase mwakutambukila. Winsley ambile ngwenyi: “Omu twaliwanyine twashimutwilile omu japwa jingalila kana, namijimbu yakunyima yakujingalila kana, nakushimutwila nawa omu tunahase kulizanga vyaungeji kana.” Vosena vaze vapwile nakuya vavahanyine ngonga yakuhakamo jimbalaka jakusavalamo namishikitela. Ungeji kana wapwile wausuku, ngocho vanyinyine jindeke kavali, nakutambuka nawa jiola jajivulu mumato akusonga.

 Uno vandumbwetu vaze vapwile nakuya ungeji kana vevwile ngachilihi? Claude napuwenyi Lisette vaze vapwile namyaka yakuzomboka 60, navakiko vetavilile kuya. Claude ambile ngwenyi: “Ngwawahililile chikuma numba tuhu ngwalizakaminyine mwomwo vatulwezele ngwavo tulwiji vatwama kujingalila kana vapwa vamalolwa chikuma kaha nawa vamuta.” Lisette naikiye alizakaminyine, ambile ngwenyi: “Ngwalizakaminyine numba nge nangukahasa kuhanjika malimi Amerindian.”

 Mickaël naikiye alizakaminyine hachuma chochimwe. Ambile ngwenyi: “Kangwatachikijile lilimi lyaWayanako, ngocho ngwahehwojwele haInternet mangana ngutachikize mazu veji kuzachisanga mulilimi lyavo hakulimeneka.”

 Shirley nalunga lyenyi Johann vasonekele mukana wamalimi veji kuhanjikanga kujingalila jakungenge yakalwiji waMaroni. Ambile ngwenyi: “Twatutulwile jivindiyo ha jw.org jamumalimi akungalila kana nakutonda mikanda yamulilimi lyaWayana.”

Lyachivali haJuly 4, lizavu lyosena lyanyinyine ndeke muSaint-Laurent du Maroni, nakuya mumbaka yayindende yatwamina mukachi kaFrench Guiana.

 Hamakumbi awana akavangijileho, lizavu lyosena lyambulwilile mujingalila jakumembo jamuMaroni, kaha hakuya kujingalila kana vazachishile mato akusonga vavuluka ngwavo pirogues. Roland uze apwile halizavu lyavatu vayile nakwambulula ambile ngwenyi: “Vatu vahanjika malimi Amerindian vawahililile chikuma hakushimutwila navo vihande vyamuMbimbiliya. Vatu kana vahulishilenga vihula vyavivulu, kaha vamwe vasakile tulinangule navo Mbimbiliya.”

 Mungalila yimwe Johann napuwenyi Shirley vawanyine valunga napwevo vaze vafwishile kausoko kavo uze alijihile. Johann ambile ngwenyi: “Twavatalishile vindiyo yaha jw.org yakwamba ngwavo Mutu WakuAmerica Mwatachikiza Tengi (A Native American Finds His Creator). Vindiyo kana yakwachile chikuma kumuchima wavavalunga napwevo. Ngocho vatuhanyine keyala yavo mwomwo vasakile tushimutwilenga lika.”

 Ngalila yakwakusuku chikuma vatambukilile shina yaAntécume Pata. Omu vahetele kungalila kana, mwangana etavishile Vinjiho valeme jimbalaka javo mangana vanoke. Kaha nawa vasanyine mukalwiji ngana muze valingilenga vatu vakungalila kana.

 Kufumaho, lizavu lyosena lyayile kungalila yaTwenké, kuze vakawanyine vatu vali nakulila mwomwo yakufwisa mutu vazanga. Éric uze apwile nakutwaminyina ungeji kana, ambile ngwenyi: “Mwangana atwitavishile tuhite mumembo nakuvendejeka vaze vapwile nakulishona. Mwangana natanga yenyi vevwile kuwaha chikuma omu twavatangilile Mbimbiliya yamulilimi lyaWayana. Twavatalishile nawa jivindiyo jakusolola vyuma atushika Yehova kutalisa kukusanguka.”

 Vatambukile kafwe minyutu 30 nandeke kufuma kuMaripasoula nakuya mumbaka yayindende yaGrand-Santi. LyaChivali naChitatu vambulilile mujimbu waMbimbiliya vatu vamumbaka yaGrand-Santi. Kaha lyaChiwana, vatambukile ungeji ukwavo uze wambachile jiola 5 nachimbwa nakuya kungalila yaApatou.

 Omu kwasalile makumbi avali nakukumisa mulimo wakwambulwila kujingalila jakungenge yakalwiji waMaroni, lizavu lyosena lyayile kungalila yaMaroons kuze kwapwilenga vandungo vaze vafumine muAfrica nakuvatwala kuSouth America mulwola luze chiyulo chaAmerica chayulilenga lifuchi lyaSuriname. Vinjiho jaYehova vasanyikile vatu vosena kukukunguluka chize chapwilile mumbalaka yayinene yize valemene mangana vakungulukilemo. Claude ambile ngwenyi: “Twawahililile chikuma hakuwana nge vatu vavavulu vejile kukukunguluka numba tuhu twavalanyine halikumbi vene lize nachimene.” Karsten uze apwile halizavu kana, ahanjikile chihande chaMbimbiliya mulilimi lyaAukan chakwamba ngwavo “Uno Echi Kuyoya Chiliko Chikiko Kaha Chatwamako Nyi?” Vatu 91 vakujingalila jakulisezaseza vajile kukukunguluka kana.

 Kutwala muze, eli lizavu lyakindulukile kuSaint-Laurent du Maroni. Kaha vosena vawahilile chikuma hakuwana nge vatu vakungalila kana vakwile kanawa kumujimbu, nakutambuka mikanda yayivulu, nakutala jivindiyo jajivulu chikuma jaVinjiho jaYehova.

 Lisette ambile ngwenyi: “Ngunahono namazu akuzachisa hakulumbununa kuwaha nguli nakwivwa hakwazana mumulimo kanou wakwambulula.” Cindy naikiye ambile ngwenyi: “Kachi nge nakupwa kuya cheka, kaha ngunalizange kulinga ngocho. Hakusaka mwivwishise kanawa omu nguli nakwivwa, kuvanga nayenu mwazataho lyehi mulimo kana.”

 Ou ungeji wakuya nakwambulula walingishile vavavulu vafwile kuzata cheka mulimo kana. Mickaël ambile ngwenyi: “Tunalizange kuya cheka.” Winsley nayi cheka kungalila yaSaint-Laurent du Maroni. Claude napuwenyi Lisette vaze vali namyaka yakuzomboka 60 vanayi cheka kuApatou.