Livaji Lize Lyanehele Mujimbu Wamwaza
Mu 2017, lizavu lyaVinjiho jaYehova vayile ungeji kungalila yaMosquito (Miskito) muNicaragua. Vazachishile wato uze vavulukile ngwavo, Sturi Yamni. Stephen uze apwile hamukana kana, ambile ngwenyi: “Twafwilile kuya nakukolezeza kalizavu kakandende kaVinjiho vaze vapwile nakutwama kungalila yakumembo mangana tuvakafwe kwambulula mujimbu wamwaza mujingalila jajivulu.”
Shikaho ava Vinjiho 12 vafumine kuPearl Lagoon ungeji wakutambuka jikilomita 200 nakuya kuRío Grande de Matagalpa. Ava Vinjiho kavatachikijile ngwavo wato wavo uze wapwile nalijina lize lyalumbunwine mujimbu wamwaza mulilimi lyaMiskito, naukafwa vatu vamungalila kanako. Hanyima yakutambuka jola 12, Vinjiho vahetele jino mungalila yaLa Cruz de Río Grande. Vandumbwetu 6 vakungalila kana vatambwokesele nachisambo ava vandumbwetu vavatambukilile.
Ufuku vene uze, kwasolokele ukalu wakulijila. Kwapwile peho navula yayinene chikuma yize yazalishile kalwiji Río Grande de Matagalpa. Nakushimbula chiku, kalwiji azalile chikuma, kaha meya atwalileho lika kuvula hamakumbi avali. Zuvo yaWangana najizuvo jeka jamuLa Cruz jengilile mumeya. Vandumbwetu vaze vayile kungalila kana, vakafwile vandumbwavo vafume mujizuvo javo nakwalukila kuvihela vyeka. Vandumbwetu vavavulu vatwamine makumbi avali muzuvo yandumbwetu yize yapwile natupete vahelu.
Zuvo yaWangana yamuLa Cruz yili mumeya
Kuheta halikumbi lyamuchitatu, mukulwane wambaka yaLa Cruz ayile kuli vaze Vinjiho vayile kungalila kana mangana vamukafwe. Hakuwana nge wato vavuluka ngwavo, Sturi Yamni wapwile wakukola nakuhasa kuzauka kalwiji uze azalile nameya, ngocho uze mukulwane wambaka alombele vandumbwetu mangana vatwale lizavu lyenyi lyavaka-kukafwa vatu vapwile muukalu kujingalila jeka. Shikaho vaze Vinjiho vetavilile kumukafwa.
Kaha likumbi lyakavangijileho, Vinjiho vatatu vayile hamwe nalize lizavu lyavaka-kukafwa vatu vali muukalu. Stephen ambile ngwenyi: “Halwola kana kalwiji azalile chikuma. Kaha mitondo yayinene yize yakekukile yapwile nakufungumuka hakalwiji, hapwile nawa majinga amanene namuta chikuma.” Chamokomoko naukalu kanou, uze wato wahashile kuya kujingalila jitatu.
Halwola kana ava Vinjiho vitatu, vaputukile kuvendejeka vatu vakungalila kana. Kaha nawa vahanyine Tonenu! yamu 2017 yize yapwile namutwe wakwamba ngwavo “Vyuma Mwatela Kulinga Nge Kunasoloka Ponde.”
Vatu vaze vatwamine kujingalila kana, vevwile chikuma kuwaha hakumona omu Vinjiho vavakafwile kumujimba nakushipilitu. Vatu vamwe vambile ngwavo: “Vinjiho vafwila kukafwa vatu nge vali muukalu.” Kaha veka nawa ngwavo: “Vinjiho vafwila kukafwa vakwavo muchitungilo.” Omu vamwene Vinjiho vali nakuzata nangolo hakukafwa vandumbwavo navatu veka, vatu vavavulu vafwililile kwivwilila kumujimbu wamuMbimbiliya wakuvavendejeka.
Marco, ali hamukana wavatu vaze vali nakuya nakwambulula mujimbu wamwaza kujingalila jakumembo, kuzachisa wato vavuluka ngwavo Sturi Yamni
Wato vavuluka ngwavo Sturi Yamni vanausulika mungalila muze mwapwile livaji