Irma wakulifuchi lyaGermany, ali namyaka yakusemuka kafwe 90. Apwile muponde mapapa kavali, kaha nawa vamupulilenga mapapa kakavulu. Ngocho oholyapwa jino kahasa kwambulwila kuzuvo hizuvo ngana muze alingilenga kunyimako. Irma eji kulwezangako vausoko namasepa jenyi vyuma afwelela kuhichila mukuvasonekela mikanda. Mikanda eji kuvasonekelanga yakuvakolezeza nakuvavendejeka yeji kuvahetanga kumichima, kaha veji kumutuminanga shinga nakumulweza ngwavo vali nakuvandamina avatumine yikwavo. Kaha nawa eji kutambulanga mikanda yakumusakwilila hakuvakolezeza, nakumulweza avasonekele yikwavo. Irma ambile ngwenyi, “Kutambula mikanda kana cheji kungwivwisanga kuwaha, nakutwalaho lika kwambulila vatu.”

 Irma eji kutuminanga nawa mikanda vatu vaze vatwama hamembo akulamina vaze vaviza chikuma. Ambile ngwenyi: “Kashinakaji umwe wapwevo angutuminyine shinga nakungulweza ngwenyi, mukanda ngwamutuminyinyine wamuvendejekele chikuma omu afwishile lunga lyenyi. Eji kuhakanga uze mukanda muMbimbiliya yenyi nakuutanga chingoloshi hichingoloshi. Pwevo weka nawa uze afwishile lunga lyenyi ahanjikile ngwenyi, mikanda yize amusonekelele ndumbwetu Irma yamukafwile chikuma kuhambaka navyuma anangwilenga kapilishitu kavo. Ou pwevo apwile navihula vyavivulu, ngocho ndumbwetu Irma amusonekelele ngwenyi akamutambukile mangana vakashimutwile kanawa.

 Mutu umwe uze alitachikijile naIrma alukilile kungalila yakwakusuku. Alwezele Irma amusonekelenga mikanda. Irma ambile ngwenyi: “Ou pwevo alaminenga mikanda yosena yize ngwamusonekelelenga. Kahomu afwile, mwanenyi angutuminyinyine shinga nakungulweza ngwenyi atangile mikanda yosena yize ngwapwilenga nakutumina naye. Shikaho angulombele mangana naikiye ngumusonekelenga.”

 Irma eji kulivwisanga kuwaha kuzata mulimo wakwambulula. Ambile ngwenyi: “Ngweji kulombanga Yehova atwaleho lika kunguhana ngolo jakumuzachila. Numba tuhu kangwahasa kuya kuzuvo hizuvoko, oloze ngweji kuzatanga kweseka nahakumina ngolo jami.”