Ong-Li uze apwa Chinjiho chaYehova muBulgaria, apwile nakulinangula Mbimbiliya napwevo umwe walijina lyaZlatka. Oloze lunga lyaZlatka kapwile nakulinangulako. Ong-Li ambile ngwenyi: “Omu twapwile nakulinangula chihande chapwile nakuhanjika hatanga, ngwashindakanyine chishina chakwamba nge chapwa chachilemu kulweza vaka-mahyetu navana vetu ngwetu twavazanga. Zlatka angutalile oku nahombo, nakwamba ngwenyi kanda lyehi ngulwezengaho lunga lyami chipwe mwanami wapwevo uze ali namyaka 9 ngwami ngwavazangako.”

 Zlatka ambile nawa ngwenyi: “Ngunahase kuvalingila kala vyuma, oloze kangweshi kuhasa kuhanjika mazu kanako mwomwo mama kanda lyehi angulwezengaho ngwenyi anguzanga, kaha nawa kaka kanda lyehi alwezengaho mama ngwenyi amuzanga.” Ong-Li alwezele Zlatka ngwenyi, Yehova alwezele Yesu ngwenyi amuzanga. (Mateu 3:17) Shikaho Ong-Li akolezezele Zlatka alombe kuli Yehova amukafwe nakuzata nangolo mangana alwezenga lunga lyenyi namwanenyi ngwenyi avazanga.

 Ong-Li ambile ngwenyi: “Omu mwahichile makumbi avali, Zlatka angulwezele ngwenyi alombele kuli Yehova amukafwe. Kahomu lunga akindulukile hembo, amulwezele ngwenyi nalinangula nge chapwa chachilemu mapwevo kuvumbika nakuzanga malunga javo. Hanyima yakulihulika chindende, Zlatka alwezele lunga lyenyi ngwenyi amuzanga chikuma. Kaha nawa omu mwanenyi akindulukile hembo, Zlatka amupakachile mukasamba nakumulweza ngwenyi ngwakuzanga chikuma. Kufumaho, Zlatka angulwezele ngwenyi: ‘Muchima wami jino unaundu. Hamyaka yosena yinahichimo, chinangukaluhwilanga kuhanjika ngwami ngwamizanga, oloze Yehova nangukafwe, kaha ngunapu jino wakukasunuka kuhanjika mazu kana kuli vaka-tanga yami.’”

 Ong-Li ambile nawa ngwenyi: “Omu mwahichile chalumingo chimwe ngwaliwanyine nalunga lyaZlatka, kaha ambile ngwenyi: ‘Vatu vangulwezele ngwavo Zlatka katela kulinangula Mbimbiliya nayenuko, oloze ngunamono chikupu ngwami kulinangula Mbimbiliya chinakafwe tanga yetu yipwenga yakuwahilila kaha nawa yakulinunga.’”