Ndumbwetu Osman napuwenyi namwanavo wapwevo, vapwile nakwambulwila kwakamwihi namafuka kuzachisa kalitemba kakushindumuna kamikanda mulifuchi lyaChile. Kaha kwejile lizavu lyavatu vavavulu vaze vejile nakufunda mufu oku vali nakuvumisa visaji. Vatu vamwe vapwile halizavu kana, vamwene ndumbu Osman kupwa nge pashita yavo. Kaha vejile kuli ikiye nakumumeneka nakwamba ngwavo: “Vapashita, munalingi kanawa hakulivanga kwiza, twapwanga nakumishinganyeka.”

 Numba tuhu Osman esekele kuvalumbunwina ngwenyi kapwile pashita yavoko, oloze kavamwivwishishileko mwomwo yavyema vyapwileko. Kaha lize lizavu lyayile hamafuka. Jino omu mwahichile minyutu yayindende, vatu vamwe vakindulukile kuli ikiye nakumulweza ngwavo: “Vapashita mwane tuli nakumivandamina.”

 Omu vyema vyakumine, ndumbu Osman avalumbunwinyine ngwenyi kapwile pashita yavoko, kaha avalwezele vyuma apwile nakulinga kuchihela kana. Hakuwana nge pashita yavo kejileko, ngocho valwezele ndumbu Osman ngwavo: “Tunakumilomba mwizenga mutukafweko kutangisa vatu mazu aKalunga.” Ou ndumbwetu etavile kuya navo.

 Oloze omu vapwile nakuya, ndumbwetu Osman aputukile kuvahulisa vamulweze lijina lyamutu nafu navyuma vyeka vyakupandama kumutu kana. Kufumaho aputukile kushinganyeka visoneka vize mwaya nakuzachisa. Omu ahetele, alijimbwile kuvatu nakuvalweza ngwenyi apwa Chinjiho chaYehova. Shikaho apwile nakuzata mulimo wakwambulula mujimbu wamwaza.

 Kaha avatangililile mukanda waKusoloka 21:3, 4 nawaYowano 5:28, 29, nakuvalumbunwina ngwenyi Kalunga katengele vatu ngwenyi vafwengangako. Avalwezele ngwenyi, kalinwomu Kalunga asangule vafu, nakuvalingisa vakayoye haya myaka yosena hamavu. Omu Osman akumishile kunangula, vatu vawahililile chikuma nakumusakwilila hakuvalweza “mujimbu wamwaza waYehova.” Kufumaho, akindulukile cheka hakalitemba kakushindumuna kamikanda.

 Omu vakumishile kufunda, vatu vamwe vejile kuze kukalitemba, kaha vahulishile Osman natanga yenyi vihula vyakupandama kuMbimbiliya. Vashimutwilile navo halwola lwalusuku, kaha vavahanyine mikanda yayivulu yapwile hakalitemba.