Likumbi limwe mungalila yaAlberta, muCanada mwatuchile chikuma kaha nawa kwapwile peho. Halikumbi kana Bob apwile nakutambukisa minyau yize yapwile nakututa kafwe jikilomita 100 haola yimwe. Ngocho kafumbo wakuminyau yenyi wakuchimoswe atotokele. Bob katachikijile vyuma vyasolokeleko, ngocho atwalilileho kutambuka tunda yajikilomita 5.

 Bob asonekelele mukanda Vinjiho jaYehova vamungalila kana, nakulumbununa vyuma vyasolokele ngwenyi: “Vakweze vatanu vaze vapwile muminyau yimwe vejile kwakamwihi nayami nakungulweza ngwimike minyau yami. Vangulweze ngwavo, kafumbo wakuminyau yami natotoka. Ngocho ngwemanyine, kaha valisuwile kunguhakila kafumbo weka. Kangwatachikijile numba nge ngwapwile nakafumbo weka chipwe chikungo chakuzundwisa minyauko. Hakuwana nge ngwapwile nguchitonji, ngwatwamine muchitwamo chami chakushindumuna kukulo yamukwakwa, kaha vakiko vengilile mwishi yaminyau yami nakumbata kafumbo nachikungo chakuzundwisa minyau nakunguhakila kafumbo. Halikumbi kana kwatuchile kaha nawa kwapwile mbundu chikuma. Numba tuhu vavwalile kanawa, oloze vanguwahishilile minyau, ngocho ngwatwalilileho naungeji wami. Mulimo kana kachi kangwahashile kuuzatako.

 “Ngweji kusakwililanga chikuma vaze Vinjiho vakweze vatanu vaze vangukafwile. Vakweze kana vapwile nakuya nakwambulula mujimbu kuzuvo hizuvo. Chikupu vene, ava vakweze vateselemo vyuma vyapwile nakunangula. Kachi nge kavangukafwileko kachi vyuma vyangukaluhwilile chikuma. Ngocho ngweji kuvasakwililanga chikuma. Chapwile kwijiva nge Kalunga atumine vangelo mangana vezenga nakungukafwa.